మంత్రాలు & శ్లోకాలు | నారాయణీయం
నారాయణీయం ద్వితీయదశకమ్
ద్వితీయదశకమ్ (౨) – భగవతః స్వరూపమాధుర్యం తథా భక్తిమహత్త్వమ్
సూర్యస్పర్ధికిరీటమూర్ధ్వతిలకప్రోద్భాసిఫాలాన్తరం
కారుణ్యాకులనేత్రమార్ద్రహసితోల్లాసం సునాసాపుటమ్ |
గణ్డోద్యన్మకరాభకుణ్డలయుగం కణ్ఠోజ్జ్వలత్కౌస్తుభం
త్వద్రూపం వనమాల్యహారపటలశ్రీవత్సదీప్రం భజే || ౨-౧ ||
కేయూరాఙ్గదకఙ్కణోత్తమమహారత్నాఙ్గులీయాఙ్కిత-
శ్రీమద్బాహుచతుష్కసఙ్గతగదాశఙ్ఖారిపఙ్కేరుహామ్ |
కాఞ్చిత్కాఞ్చనకాఞ్చిలాఞ్ఛితలసత్పీతాంబరాలంబినీ-
మాలంబే విమలాంబుజద్యుతిపదాం మూర్తిం తవార్తిచ్ఛిదమ్ || ౨-౨ ||
యత్త్రైలోక్యమహీయసోఽపి మహితం సమ్మోహనం మోహనాత్
కాన్తం కాన్తినిధానతోఽపి మధురం మాధుర్యధుర్యాదపి |
సౌన్దర్యోత్తరతోఽపి సున్దరతరం త్వద్రూపమాశ్చర్యతో-
ప్యాశ్చర్యం భువనే న కస్య కుతుకం పుష్ణాతి విష్ణో విభో || ౨-౩ ||
తత్తాదృఙ్మధురాత్మకం తవ వపుః సమ్ప్రాప్య సమ్పన్మయీ
సా దేవీ పరమోత్సుకా చిరతరం నాఽస్తే స్వభక్తేష్వపి |
తేనాస్యా బత కష్టమచ్యుత విభో త్వద్రూపమానోజ్ఞక-
ప్రేమస్థైర్యమయాదచాపలబలాచ్చాపల్యవార్తోదభూత్ || ౨-౪ ||
లక్ష్మీస్తావకరామణీయకహృతైవేయం పరేష్వస్థిరే-
త్యస్మిన్నన్యదపి ప్రమాణమధునా వక్ష్యామి లక్ష్మీపతే |
యే త్వద్ధ్యానగుణానుకీర్తనరసాసక్తా హి భక్తా జనా-
స్తేష్వేషా వసతి స్థిరైవ దయితప్రస్తావదత్తాదరా || ౨-౫ ||
ఏవంభూతమనోజ్ఞతానవసుధానిష్యన్దసన్దోహనం
త్వద్రూపం పరచిద్రసాయనమయం చేతోహరం శృణ్వతామ్ |
సద్యః ప్రేరయతే మతిం మదయతే రోమాఞ్చయత్యఙ్గకం
వ్యాసిఞ్చత్యపి శీతబాష్పవిసరైరానన్దమూర్ఛోద్భవైః || ౨-౬ ||
ఏవంభూతతయా హి భక్త్యభిహితో యోగస్స యోగద్వయాత్
కర్మజ్ఞానమయాద్భృశోత్తమతరో యోగీశ్వరైర్గీయతే |
సౌన్దర్యైకరసాత్మకే త్వయి ఖలు ప్రేమప్రకర్షాత్మికా
భక్తిర్నిశ్రమమేవ విశ్వపురుషైర్లభ్యా రమావల్లభ || ౭ ||
నిష్కామం నియతస్వధర్మచరణం యత్కర్మయోగాభిధం
తద్దూరేత్యఫలం యదౌపనిషదజ్ఞానోపలభ్యం పునః |
తత్త్వవ్యక్తతయా సుదుర్గమతరం చిత్తస్య తస్మాద్విభో
త్వత్ప్రేమాత్మకభక్తిరేవ సతతం స్వాదీయసీ శ్రేయసీ || ౨-౮ ||
అత్యాయాసకరాణి కర్మపటలాన్యాచర్య నిర్యన్మలా
బోధే భక్తిపథేఽథవాప్యుచితతామాయాన్తి కిం తావతా |
క్లిష్ట్వా తర్కపథే పరం తవ వపుర్బ్రహ్మాఖ్యమన్యే పున-
శ్చిత్తార్ద్రత్వమృతే విచిన్త్య బహుభిస్సిద్ధ్యన్తి జన్మాన్తరైః || ౨-౯ ||
త్వద్భక్తిస్తు కథారసామృతఝరీనిర్మజ్జనేన స్వయం
సిద్ధ్యన్తీ విమలప్రబోధపదవీమక్లేశతస్తన్వతీ |
సద్యస్సిద్ధికరీ జయత్యయి విభో సైవాస్తు మే త్వత్పద-
ప్రేమప్రౌఢిరసార్ద్రతా ద్రుతతరం వాతాలయాధీశ్వర || ౨-౧౦ ||
ఇతి ద్వితీయదశకం సమాప్తమ్ |
మంత్రాలు & శ్లోకాలు | నారాయణీయం
Narayaneeyam Dasakam 2
nārāyaṇīyaṁ dvitīyadaśakam (2) – bhagavataḥ svarūpamādhuryaṁ tathā bhaktimahattvam
sūryaspardhikirīṭamūrdhvatilakaprōdbhāsiphālāntaraṁ
kāruṇyākulanētramārdrahasitōllāsaṁ sunāsāpuṭam |
gaṇḍōdyanmakarābhakuṇḍalayugaṁ kaṇṭhōjjvalatkaustubhaṁ
tvadrūpaṁ vanamālyahārapaṭalaśrīvatsadīpraṁ bhajē || 2-1 ||
kēyūrāṅgadakaṅkaṇōttamamahāratnāṅgulīyāṅkita-
śrīmadbāhucatuṣkasaṅgatagadāśaṅkhāripaṅkēruhām |
kāñcitkāñcanakāñcilāñchitalasatpītāṁbarālaṁbinī-
mālaṁbē vimalāṁbujadyutipadāṁ mūrtiṁ tavārticchidam || 2-2 ||
yattrailōkyamahīyasō:’pi mahitaṁ sammōhanaṁ mōhanāt
kāntaṁ kāntinidhānatō:’pi madhuraṁ mādhuryadhuryādapi |
saundaryōttaratō:’pi sundarataraṁ tvadrūpamāścaryatō-
pyāścaryaṁ bhuvanē na kasya kutukaṁ puṣṇāti viṣṇō vibhō || 2-3 ||
tattādr̥ṅmadhurātmakaṁ tava vapuḥ samprāpya sampanmayī
sā dēvī paramōtsukā cirataraṁ nā:’stē svabhaktēṣvapi |
tēnāsyā bata kaṣṭamacyuta vibhō tvadrūpamānōjñaka-
prēmasthairyamayādacāpalabalāccāpalyavārtōdabhūt || 2-4 ||
lakṣmīstāvakarāmaṇīyakahr̥taivēyaṁ parēṣvasthirē-
tyasminnanyadapi pramāṇamadhunā vakṣyāmi lakṣmīpatē |
yē tvaddhyānaguṇānukīrtanarasāsaktā hi bhaktā janā-
stēṣvēṣā vasati sthiraiva dayitaprastāvadattādarā || 2-5 ||
ēvaṁbhūtamanōjñatānavasudhāniṣyandasandōhanaṁ
tvadrūpaṁ paracidrasāyanamayaṁ cētōharaṁ śr̥ṇvatām |
sadyaḥ prērayatē matiṁ madayatē rōmāñcayatyaṅgakaṁ
vyāsiñcatyapi śītabāṣpavisarairānandamūrchōdbhavaiḥ || 2-6 ||
ēvaṁbhūtatayā hi bhaktyabhihitō yōgassa yōgadvayāt
karmajñānamayādbhr̥śōttamatarō yōgīśvarairgīyatē |
saundaryaikarasātmakē tvayi khalu prēmaprakarṣātmikā
bhaktirniśramamēva viśvapuruṣairlabhyā ramāvallabha || 7 ||
niṣkāmaṁ niyatasvadharmacaraṇaṁ yatkarmayōgābhidhaṁ
taddūrētyaphalaṁ yadaupaniṣadajñānōpalabhyaṁ punaḥ |
tattvavyaktatayā sudurgamataraṁ cittasya tasmādvibhō
tvatprēmātmakabhaktirēva satataṁ svādīyasī śrēyasī || 2-8 ||
atyāyāsakarāṇi karmapaṭalānyācarya niryanmalā
bōdhē bhaktipathē:’thavāpyucitatāmāyānti kiṁ tāvatā |
kliṣṭvā tarkapathē paraṁ tava vapurbrahmākhyamanyē puna-
ścittārdratvamr̥tē vicintya bahubhissiddhyanti janmāntaraiḥ || 2-9 ||
tvadbhaktistu kathārasāmr̥tajharīnirmajjanēna svayaṁ
siddhyantī vimalaprabōdhapadavīmaklēśatastanvatī |
sadyassiddhikarī jayatyayi vibhō saivāstu mē tvatpada-
prēmaprauḍhirasārdratā drutataraṁ vātālayādhīśvara || 2-10 ||
iti dvitīyadaśakaṁ samāptam |
