మంత్రాలు & శ్లోకాలు | శ్రీ భగవద్గీత శ్లోకాలు
ద్వాదశోఽధ్యాయః (12) – భక్తియోగః
అర్జున ఉవాచ –
ఏవం సతతయుక్తా యే భక్తాస్త్వాం పర్యుపాసతే |
యే చాప్యక్షరమవ్యక్తం తేషాం కే యోగవిత్తమాః || ౧ ||
శ్రీభగవానువాచ –
మయ్యావేశ్య మనో యే మాం నిత్యయుక్తా ఉపాసతే |
శ్రద్ధయా పరయోపేతాః తే మే యుక్తతమా మతాః || ౨ ||
యే త్వక్షరమనిర్దేశ్యమవ్యక్తం పర్యుపాసతే |
సర్వత్రగమచింత్యంచ కూటస్థమచలం ధ్రువమ్ || ౩ ||
సన్నియమ్యేంద్రియగ్రామం సర్వత్ర సమబుద్ధయః |
తే ప్రాప్నువంతి మామేవ సర్వభూతహితే రతాః || ౪ ||
క్లేశోఽధికతరస్తేషామవ్యక్తాసక్తచేతసామ్ |
అవ్యక్తా హి గతిర్దుఃఖం దేహవద్భిరవాప్యతే || ౫ ||
యే తు సర్వాణి కర్మాణి మయి సన్న్యస్య మత్పరాః |
అనన్యేనైవ యోగేన మాం ధ్యాయంత ఉపాసతే || ౬ ||
తేషామహం సముద్ధర్తా మృత్యుసంసారసాగరాత్ |
భవామి న చిరాత్పార్థ మయ్యావేశితచేతసామ్ || ౭ ||
మయ్యేవ మన ఆధత్స్వ మయి బుద్ధిం నివేశయ |
నివసిష్యసి మయ్యేవ అత ఊర్ధ్వం న సంశయః || ౮ ||
అథ చిత్తం సమాధాతుం న శక్నోషి మయి స్థిరమ్ |
అభ్యాసయోగేన తతో మామిచ్ఛాప్తుం ధనంజయ || ౯ ||
అభ్యాసేఽప్యసమర్థోఽసి మత్కర్మపరమో భవ |
మదర్థమపి కర్మాణి కుర్వన్సిద్ధిమవాప్స్యసి || ౧౦ ||
అథైతదప్యశక్తోఽసి కర్తుం మద్యోగమాశ్రితః |
సర్వకర్మఫలత్యాగం తతః కురు యతాత్మవాన్ || ౧౧ ||
శ్రేయో హి జ్ఞానమభ్యాసాజ్జ్ఞానాద్ధ్యానం విశిష్యతే |
ధ్యానాత్కర్మఫలత్యాగస్త్యాగాచ్ఛాంతిరనంతరమ్ || ౧౨ ||
అద్వేష్టా సర్వభూతానాం మైత్రః కరుణ ఏవ చ |
నిర్మమో నిరహంకారః సమదుఃఖసుఖః క్షమీ || ౧౩ ||
సంతుష్టః సతతం యోగీ యతాత్మా దృఢనిశ్చయః |
మయ్యర్పితమనోబుద్ధిర్యో మద్భక్తః స మే ప్రియః || ౧౪ ||
యస్మాన్నోద్విజతే లోకో లోకాన్నోద్విజతే చ యః |
హర్షామర్షభయోద్వేగైర్ముక్తో యః స చ మే ప్రియః || ౧౫ ||
అనపేక్షః శుచిర్దక్ష ఉదాసీనో గతవ్యథః |
సర్వారంభపరిత్యాగీ యో మద్భక్తః స మే ప్రియః || ౧౬ ||
యో న హృష్యతి న ద్వేష్టి న శోచతి న కాంక్షతి |
శుభాశుభపరిత్యాగీ భక్తిమాన్యః స మే ప్రియః || ౧౭ ||
సమః శత్రౌ చ మిత్రే చ తథా మానాపమానయోః |
శీతోష్ణసుఖదుఃఖేషు సమః సంగవివర్జితః || ౧౮ ||
తుల్యనిందాస్తుతిర్మౌనీ సంతుష్టో యేన కేనచిత్ |
అనికేతః స్థిరమతిర్భక్తిమాన్మే ప్రియో నరః || ౧౯ ||
యే తు ధర్మ్యామృతమిదం యథోక్తం పర్యుపాసతే |
శ్రద్దధానా మత్పరమా భక్తాస్తేఽతీవ మే ప్రియాః || ౨౦ ||
ఇతి శ్రీమద్భగవద్గీతాసూపనిషత్సు బ్రహ్మవిద్యాయాం యోగశాస్త్రే శ్రీకృష్ణార్జునసంవాదే భక్తియోగో నామ ద్వాదశోఽధ్యాయః || ౧౨ ||
మంత్రాలు & శ్లోకాలు | శ్రీ భగవద్గీత శ్లోకాలు
Bhagavad gita Chapter 12 : dvādaśō:’dhyāyaḥ – bhaktiyōgaḥ
arjuna uvāca –
ēvaṁ satatayuktā yē bhaktāstvāṁ paryupāsatē |
yē cāpyakṣaramavyaktaṁ tēṣāṁ kē yōgavittamāḥ || 1 ||
śrībhagavānuvāca –
mayyāvēśya manō yē māṁ nityayuktā upāsatē |
śraddhayā parayōpētāḥ tē mē yuktatamā matāḥ || 2 ||
yē tvakṣaramanirdēśyamavyaktaṁ paryupāsatē |
sarvatragamacintyañca kūṭasthamacalaṁ dhruvam || 3 ||
sanniyamyēndriyagrāmaṁ sarvatra samabuddhayaḥ |
tē prāpnuvanti māmēva sarvabhūtahitē ratāḥ || 4 ||
klēśō:’dhikatarastēṣāmavyaktāsaktacētasām |
avyaktā hi gatirduḥkhaṁ dēhavadbhiravāpyatē || 5 ||
yē tu sarvāṇi karmāṇi mayi sannyasya matparāḥ |
ananyēnaiva yōgēna māṁ dhyāyanta upāsatē || 6 ||
tēṣāmahaṁ samuddhartā mr̥tyusaṁsārasāgarāt |
bhavāmi na cirātpārtha mayyāvēśitacētasām || 7 ||
mayyēva mana ādhatsva mayi buddhiṁ nivēśaya |
nivasiṣyasi mayyēva ata ūrdhvaṁ na saṁśayaḥ || 8 ||
atha cittaṁ samādhātuṁ na śaknōṣi mayi sthiram |
abhyāsayōgēna tatō māmicchāptuṁ dhanañjaya || 9 ||
abhyāsē:’pyasamarthō:’si matkarmaparamō bhava |
madarthamapi karmāṇi kurvansiddhimavāpsyasi || 10 ||
athaitadapyaśaktō:’si kartuṁ madyōgamāśritaḥ |
sarvakarmaphalatyāgaṁ tataḥ kuru yatātmavān || 11 ||
śrēyō hi jñānamabhyāsāj-jñānāddhyānam viśiṣyatē |
dhyānātkarmaphalatyāgastyāgācchāntiranantaram || 12 ||
advēṣṭā sarvabhūtānāṁ maitraḥ karuṇa ēva ca |
nirmamō nirahaṅkāraḥ samaduḥkhasukhaḥ kṣamī || 13 ||
santuṣṭaḥ satataṁ yōgī yatātmā dr̥ḍhaniścayaḥ |
mayyarpitamanōbuddhiryō madbhaktaḥ sa mē priyaḥ || 14 ||
yasmānnōdvijatē lōkō lōkānnōdvijatē ca yaḥ |
harṣāmarṣabhayōdvēgairmuktō yaḥ sa ca mē priyaḥ || 15 ||
anapēkṣaḥ śucirdakṣa udāsīnō gatavyathaḥ |
sarvārambhaparityāgī yō madbhaktaḥ sa mē priyaḥ || 16 ||
yō na hr̥ṣyati na dvēṣṭi na śōcati na kāṅkṣati |
śubhāśubhaparityāgī bhaktimānyaḥ sa mē priyaḥ || 17 ||
samaḥ śatrau ca mitrē ca tathā mānāpamānayōḥ |
śītōṣṇasukhaduḥkhēṣu samaḥ saṅgavivarjitaḥ || 18 ||
tulyanindāstutirmaunī santuṣṭō yēna kēnacit |
anikētaḥ sthiramatirbhaktimānmē priyō naraḥ || 19 ||
yē tu dharmyāmr̥tamidaṁ yathōktaṁ paryupāsatē |
śraddadhānā matparamā bhaktāstē:’tīva mē priyāḥ || 20 ||
iti śrīmadbhagavadgītāsūpaniṣatsu brahmavidyāyāṁ yōgaśāstrē śrīkr̥ṣṇārjunasaṁvādē bhaktiyōgō nāma dvādaśō:’dhyāyaḥ || 12 ||