ఆనందలహరీ స్తోత్రం
Anandalahari Stotram in Telugu
భవాని స్తోతుం త్వాం ప్రభవతి చతుర్భిర్న వదనైః
ప్రజానామీశానస్త్రిపురమథనః పంచభిరపి |
న షడ్భిః సేనానీర్దశశతముఖైరప్యహిపతి-
-స్తదాన్యేషాం కేషాం కథయ కథమస్మిన్నవసరః || ౧ ||
ఘృతక్షీరద్రాక్షామధుమధురిమా కైరపి పదై-
-ర్విశిష్యానాఖ్యేయో భవతి రసనామాత్రవిషయః |
తథా తే సౌందర్యం పరమశివదృఙ్మాత్రవిషయః
కథంకారం బ్రూమః సకలనిగమాగోచరగుణే || ౨ ||
ముఖే తే తాంబూలం నయనయుగళే కజ్జలకలా
లలాటే కాశ్మీరం విలసతి గళే మౌక్తికలతా |
స్ఫురత్కాంచీ శాటీ పృథుకటితటే హాటకమయీ
భజామి త్వాం గౌరీం నగపతికిశోరీమవిరతమ్ || ౩ ||
విరాజన్మందారద్రుమకుసుమహారస్తనతటీ-
-నదద్వీణానాదశ్రవణవిలసత్కుండలగుణా |
నతాంగీ మాతంగీ రుచిరగతిభంగీ భగవతీ
సతీ శంభోరంభోరుహచటులచక్షుర్విజయతే || ౪ ||
నవీనార్కభ్రాజన్మణికనకభూషాపరికరై-
-ర్వృతాంగీ సారంగీరుచిరనయనాంగీకృతశివా |
తటిత్పీతా పీతాంబరలలితమంజీరసుభగా
మమాపర్ణా పూర్ణా నిరవధిసుఖైరస్తు సుముఖీ || ౫ ||
హిమాద్రేః సంభూతా సులలితకరైః పల్లవయుతా
సుపుష్పా ముక్తాభిర్భ్రమరకలితా చాలకభరైః |
కృతస్థాణుస్థానా కుచఫలనతా సూక్తిసరసా
రుజాం హంత్రీ గంత్రీ విలసతి చిదానందలతికా || ౬ ||
సపర్ణామాకీర్ణాం కతిపయగుణైః సాదరమిహ
శ్రయంత్యన్యే వల్లీం మమ తు మతిరేవం విలసతి |
అపర్ణైకా సేవ్యా జగతి సకలైర్యత్పరివృతః
పురాణోఽపి స్థాణుః ఫలతి కిల కైవల్యపదవీమ్ || ౭ ||
విధాత్రీ ధర్మాణాం త్వమసి సకలామ్నాయజననీ
త్వమర్థానాం మూలం ధనదనమనీయాంఘ్రికమలే |
త్వమాదిః కామానాం జనని కృతకందర్పవిజయే
సతాం ముక్తేర్బీజం త్వమసి పరమబ్రహ్మమహిషీ || ౮ ||
ప్రభూతా భక్తిస్తే యదపి న మమాలోలమనస-
-స్త్వయా తు శ్రీమత్యా సదయమవలోక్యోఽహమధునా |
పయోదః పానీయం దిశతి మధురం చాతకముఖే
భృశం శంకే కైర్వా విధిభిరనునీతా మమ మతిః || ౯ ||
కృపాపాంగాలోకం వితర తరసా సాధుచరితే
న తే యుక్తోపేక్షా మయి శరణదీక్షాముపగతే |
న చేదిష్టం దద్యాదనుపదమహో కల్పలతికా
విశేషః సామాన్యైః కథమితరవల్లీపరికరైః || ౧౦ ||
మహాంతం విశ్వాసం తవ చరణపంకేరుహయుగే
నిధాయాన్యన్నైవాశ్రితమిహ మయా దైవతముమే |
తథాపి త్వచ్చేతో యది మయి న జాయేత సదయం
నిరాలంబో లంబోదరజనని కం యామి శరణమ్ || ౧౧ ||
అయః స్పర్శే లగ్నం సపది లభతే హేమపదవీం
యథా రథ్యాపాథః శుచి భవతి గంగౌఘమిలితమ్ |
తథా తత్తత్పాపైరతిమలినమంతర్మమ యది
త్వయి ప్రేమ్ణా సక్తం కథమివ న జాయేత విమలమ్ || ౧౨ ||
త్వదన్యస్మాదిచ్ఛావిషయఫలలాభే న నియమ-
-స్త్వమజ్ఞానామిచ్ఛాధికమపి సమర్థా వితరణే |
ఇతి ప్రాహుః ప్రాంచః కమలభవనాద్యాస్త్వయి మన-
-స్త్వదాసక్తం నక్తందివముచితమీశాని కురు తత్ || ౧౩ ||
స్ఫురన్నానారత్నస్ఫటికమయభిత్తిప్రతిఫల-
-త్త్వదాకారం చంచచ్ఛశధరకలాసౌధశిఖరమ్ |
ముకుందబ్రహ్మేంద్రప్రభృతిపరివారం విజయతే
తవాగారం రమ్యం త్రిభువనమహారాజగృహిణి || ౧౪ ||
నివాసః కైలాసే విధిశతమఖాద్యాః స్తుతికరాః
కుటుంబం త్రైలోక్యం కృతకరపుటః సిద్ధినికరః |
మహేశః ప్రాణేశస్తదవనిధరాధీశతనయే
న తే సౌభాగ్యస్య క్వచిదపి మనాగస్తి తులనా || ౧౫ ||
వృషో వృద్ధో యానం విషమశనమాశా నివసనం
శ్మశానం క్రీడాభూర్భుజగనివహో భూషణవిధిః |
సమగ్రా సామగ్రీ జగతి విదితైవ స్మరరిపో-
-ర్యదేతస్యైశ్వర్యం తవ జనని సౌభాగ్యమహిమా || ౧౬ ||
అశేషబ్రహ్మాండప్రలయవిధినైసర్గికమతిః
శ్మశానేష్వాసీనః కృతభసితలేపః పశుపతిః |
దధౌ కంఠే హాలాహలమఖిలభూగోలకృపయా
భవత్యాః సంగత్యాః ఫలమితి చ కల్యాణి కలయే || ౧౭ ||
త్వదీయం సౌందర్యం నిరతిశయమాలోక్య పరయా
భియైవాసీద్గంగా జలమయతనుః శైలతనయే |
తదేతస్యాస్తస్మాద్వదనకమలం వీక్ష్య కృపయా
ప్రతిష్ఠామాతన్వన్నిజశిరసి వాసేన గిరిశః || ౧౮ ||
విశాలశ్రీఖండద్రవమృగమదాకీర్ణఘుసృణ-
-ప్రసూనవ్యామిశ్రం భగవతి తవాభ్యంగసలిలమ్ |
సమాదాయ స్రష్టా చలితపదపాంసూన్నిజకరైః
సమాధత్తే సృష్టిం విబుధపురపంకేరుహదృశామ్ || ౧౯ ||
వసంతే సానందే కుసుమితలతాభిః పరివృతే
స్ఫురన్నానాపద్మే సరసి కలహంసాలిసుభగే |
సఖీభిః ఖేలంతీం మలయపవనాందోలితజలే
స్మరేద్యస్త్వాం తస్య జ్వరజనితపీడాపసరతి || ౨౦ ||
ఇతి శ్రీమత్పరమహంసపరివ్రాజకాచార్యస్య శ్రీగోవిందభగవత్పూజ్యపాదశిష్యస్య శ్రీమచ్ఛంకరభగవతః కృతౌ ఆనందలహరీ |
Anandalahari Stotram in English
bhavāni stōtuṁ tvāṁ prabhavati caturbhirna vadanaiḥ
prajānāmīśānastripuramathanaḥ pañcabhirapi |
na ṣaḍbhiḥ sēnānīrdaśaśatamukhairapyahipati-
-stadānyēṣāṁ kēṣāṁ kathaya kathamasminnavasaraḥ || 1 ||
ghr̥takṣīradrākṣāmadhumadhurimā kairapi padai-
-rviśiṣyānākhyēyō bhavati rasanāmātraviṣayaḥ |
tathā tē saundaryaṁ paramaśivadr̥ṅmātraviṣayaḥ
kathaṅkāraṁ brūmaḥ sakalanigamāgōcaraguṇē || 2 ||
mukhē tē tāmbūlaṁ nayanayugalē kajjalakalā
lalāṭē kāśmīraṁ vilasati galē mauktikalatā |
sphuratkāñcī śāṭī pr̥thukaṭitaṭē hāṭakamayī
bhajāmi tvāṁ gaurīṁ nagapatikiśōrīmaviratam || 3 ||
virājanmandāradrumakusumahārastanataṭī-
-nadadvīṇānādaśravaṇavilasatkuṇḍalaguṇā |
natāṅgī mātaṅgī ruciragatibhaṅgī bhagavatī
satī śambhōrambhōruhacaṭulacakṣurvijayatē || 4 ||
navīnārkabhrājanmaṇikanakabhūṣāparikarai-
-rvr̥tāṅgī sāraṅgīruciranayanāṅgīkr̥taśivā |
taṭitpītā pītāmbaralalitamañjīrasubhagā
mamāparṇā pūrṇā niravadhisukhairastu sumukhī || 5 ||
himādrēḥ sambhūtā sulalitakaraiḥ pallavayutā
supuṣpā muktābhirbhramarakalitā cālakabharaiḥ |
kr̥tasthāṇusthānā kucaphalanatā sūktisarasā
rujāṁ hantrī gantrī vilasati cidānandalatikā || 6 ||
saparṇāmākīrṇāṁ katipayaguṇaiḥ sādaramiha
śrayantyanyē vallīṁ mama tu matirēvaṁ vilasati |
aparṇaikā sēvyā jagati sakalairyatparivr̥taḥ
purāṇō:’pi sthāṇuḥ phalati kila kaivalyapadavīm || 7 ||
vidhātrī dharmāṇāṁ tvamasi sakalāmnāyajananī
tvamarthānāṁ mūlaṁ dhanadanamanīyāṅghrikamalē |
tvamādiḥ kāmānāṁ janani kr̥takandarpavijayē
satāṁ muktērbījaṁ tvamasi paramabrahmamahiṣī || 8 ||
prabhūtā bhaktistē yadapi na mamālōlamanasa-
-stvayā tu śrīmatyā sadayamavalōkyō:’hamadhunā |
payōdaḥ pānīyaṁ diśati madhuraṁ cātakamukhē
bhr̥śaṁ śaṅkē kairvā vidhibhiranunītā mama matiḥ || 9 ||
kr̥pāpāṅgālōkaṁ vitara tarasā sādhucaritē
na tē yuktōpēkṣā mayi śaraṇadīkṣāmupagatē |
na cēdiṣṭaṁ dadyādanupadamahō kalpalatikā
viśēṣaḥ sāmānyaiḥ kathamitaravallīparikaraiḥ || 10 ||
mahāntaṁ viśvāsaṁ tava caraṇapaṅkēruhayugē
nidhāyānyannaivāśritamiha mayā daivatamumē |
tathāpi tvaccētō yadi mayi na jāyēta sadayaṁ
nirālambō lambōdarajanani kaṁ yāmi śaraṇam || 11 ||
ayaḥ sparśē lagnaṁ sapadi labhatē hēmapadavīṁ
yathā rathyāpāthaḥ śuci bhavati gaṅgaughamilitam |
tathā tattatpāpairatimalinamantarmama yadi
tvayi prēmṇā saktaṁ kathamiva na jāyēta vimalam || 12 ||
tvadanyasmādicchāviṣayaphalalābhē na niyama-
-stvamajñānāmicchādhikamapi samarthā vitaraṇē |
iti prāhuḥ prāñcaḥ kamalabhavanādyāstvayi mana-
-stvadāsaktaṁ naktandivamucitamīśāni kuru tat || 13 ||
sphurannānāratnasphaṭikamayabhittipratiphala-
-ttvadākāraṁ cañcacchaśadharakalāsaudhaśikharam |
mukundabrahmēndraprabhr̥tiparivāraṁ vijayatē
tavāgāraṁ ramyaṁ tribhuvanamahārājagr̥hiṇi || 14 ||
nivāsaḥ kailāsē vidhiśatamakhādyāḥ stutikarāḥ
kuṭumbaṁ trailōkyaṁ kr̥takarapuṭaḥ siddhinikaraḥ |
mahēśaḥ prāṇēśastadavanidharādhīśatanayē
na tē saubhāgyasya kvacidapi manāgasti tulanā || 15 ||
vr̥ṣō vr̥ddhō yānaṁ viṣamaśanamāśā nivasanaṁ
śmaśānaṁ krīḍābhūrbhujaganivahō bhūṣaṇavidhiḥ |
samagrā sāmagrī jagati viditaiva smararipō-
-ryadētasyaiśvaryaṁ tava janani saubhāgyamahimā || 16 ||
aśēṣabrahmāṇḍapralayavidhinaisargikamatiḥ
śmaśānēṣvāsīnaḥ kr̥tabhasitalēpaḥ paśupatiḥ |
dadhau kaṇṭhē hālāhalamakhilabhūgōlakr̥payā
bhavatyāḥ saṅgatyāḥ phalamiti ca kalyāṇi kalayē || 17 ||
tvadīyaṁ saundaryaṁ niratiśayamālōkya parayā
bhiyaivāsīdgaṅgā jalamayatanuḥ śailatanayē |
tadētasyāstasmādvadanakamalaṁ vīkṣya kr̥payā
pratiṣṭhāmātanvannijaśirasi vāsēna giriśaḥ || 18 ||
viśālaśrīkhaṇḍadravamr̥gamadākīrṇaghusr̥ṇa-
-prasūnavyāmiśraṁ bhagavati tavābhyaṅgasalilam |
samādāya sraṣṭā calitapadapāṁsūnnijakaraiḥ
samādhattē sr̥ṣṭiṁ vibudhapurapaṅkēruhadr̥śām || 19 ||
vasantē sānandē kusumitalatābhiḥ parivr̥tē
sphurannānāpadmē sarasi kalahaṁsālisubhagē |
sakhībhiḥ khēlantīṁ malayapavanāndōlitajalē
smarēdyastvāṁ tasya jvarajanitapīḍāpasarati || 20 ||
iti śrīmatparamahaṁsaparivrājakācāryasya śrīgōvindabhagavatpūjyapādaśiṣyasya śrīmacchaṅkarabhagavataḥ kr̥tau ānandalaharī |
