దేవీ చతుఃషష్ట్యుపచారపూజా స్తోత్రం Devi Chatushasti Upachara Puja Stotram in telugu lo Devi Chatushasti Upachara Puja Stotram telugu pdf download అవసరం లేకుండా Devi Chatushasti Upachara Puja Stotram telugu lyrics నేరుగా భక్తులు ఇన్ తెలుగులో పారాయణం చెయ్యండి.
దేవీ చతుఃషష్ట్యుపచారపూజా స్తోత్రం
ఉషసి మాగధమంగలగాయనై-
-ర్ఝటితి జాగృహి జాగృహి జాగృహి |
అతికృపార్ద్రకటాక్షనిరీక్షణై-
-ర్జగదిదం జగదంబ సుఖీకురు || ౧ ||
కనకమయవితర్దిశోభమానం
దిశి దిశి పూర్ణసువర్ణకుంభయుక్తమ్ |
మణిమయమంటపమధ్యమేహి మాత-
-ర్మయి కృపయాశు సమర్చనం గ్రహీతుమ్ || ౨ ||
కనకకలశశోభమానశీర్షం
జలధరలంబి సముల్లసత్పతాకమ్ |
భగవతి తవ సంనివాసహేతో-
-ర్మణిమయమందిరమేతదర్పయామి || ౩ ||
తపనీయమయీ సుతూలికా
కమనీయా మృదులోత్తరచ్ఛదా |
నవరత్నవిభూషితా మయా
శిబికేయం జగదంబ తేఽర్పితా || ౪ ||
కనకమయవితర్దిస్థాపితే తూలికాఢ్యే
వివిధకుసుమకీర్ణే కోటిబాలార్కవర్ణే |
భగవతి రమణీయే రత్నసింహాసనేఽస్మి-
-న్నుపవిశ పదయుగ్మం హేమపీఠే నిధాయ || ౫ ||
మణిమౌక్తికనిర్మితం మహాంతం
కనకస్తంభచతుష్టయేన యుక్తమ్ |
కమనీయతమం భవాని తుభ్యం
నవముల్లోచమహం సమర్పయామి || ౬ ||
దూర్వయా సరసిజాన్వితవిష్ణు-
-క్రాంతయా చ సహితం కుసుమాఢ్యమ్ |
పద్మయుగ్మసదృశే పదయుగ్మే
పాద్యమేతదురరీకురు మాతః || ౭ ||
గంధపుష్పయవసర్షపదూర్వా-
-సంయుతం తిలకుశాక్షతమిశ్రమ్ |
హేమపాత్రనిహితం సహ రత్నై-
-రర్ఘ్యమేతదురరీకురు మాతః || ౮ ||
జలజద్యుతినా కరేణ జాతీ-
-ఫలతక్కోలలవంగగంధయుక్తైః |
అమృతైరమృతైరివాతిశీతై-
-ర్భగవత్యాచమనం విధీయతామ్ || ౯ ||
నిహితం కనకస్య సంపుటే
పిహితం రత్నపిధానకేన యత్ |
తదిదం జగదంబ తేఽర్పితం
మధుపర్కం జనని ప్రగృహ్యతామ్ || ౧౦ ||
ఏతచ్చంపకతైలమంబ వివిధైః పుష్పైర్ముహుర్వాసితం
న్యస్తం రత్నమయే సువర్ణచషకే భృంగైర్భ్రమద్భిర్వృతమ్ |
సానందం సురసుందరీభిరభితో హస్తైర్ధృతం తే మయా
కేశేషు భ్రమరభ్రమేషు సకలేష్వంగేషు చాలిప్యతే || ౧౧ ||
మాతః కుంకుమపంకనిర్మితమిదం దేహే తవోద్వర్తనం
భక్త్యాహం కలయామి హేమరజసా సంమిశ్రితం కేసరైః |
కేశానామలకైర్విశోధ్య విశదాన్కస్తూరికోదంచితైః
స్నానం తే నవరత్నకుంభసహితైః సంవాసితోష్ణోదకైః || ౧౨ ||
దధిదుగ్ధఘృతైః సమాక్షికైః
సితయా శర్కరయా సమన్వితైః |
స్నపయామి తవాహమాదరా-
-జ్జనని త్వాం పునరుష్ణవారిభిః || ౧౩ ||
ఏలోశీరసువాసితైః సకుసుమైర్గంగాదితీర్థోదకై-
-ర్మాణిక్యామలమౌక్తికామృతరసైః స్వచ్ఛైః సువర్ణోదకైః |
మంత్రాన్వైదికతాంత్రికాన్పరిపఠన్సానందమత్యాదరా-
-త్స్నానం తే పరికల్పయామి జనని స్నేహాత్త్వమంగీకురు || ౧౪ ||
బాలార్కద్యుతి దాడిమీయకుసుమప్రస్పర్ధి సర్వోత్తమం
మాతస్త్వం పరిధేహి దివ్యవసనం భక్త్యా మయా కల్పితమ్ |
ముక్తాభిర్గ్రథితం సుకంచుకమిదం స్వీకృత్య పీతప్రభం
తప్తస్వర్ణసమానవర్ణమతులం ప్రావర్ణమంగీకురు || ౧౫ ||
నవరత్నమయే మయార్పితే
కమనీయే తపనీయపాదుకే |
సవిలాసమిదం పదద్వయం
కృపయా దేవి తయోర్నిధీయతామ్ || ౧౬ ||
బహుభిరగరుధూపైః సాదరం ధూపయిత్వా
భగవతి తవ కేశాంకంకతైర్మార్జయిత్వా |
సురభిభిరరవిందైశ్చంపకైశ్చార్చయిత్వా
ఝటితి కనకసూత్రైర్జూటయన్వేష్టయామి || ౧౭ ||
సౌవీరాంజనమిదమంబ చక్షుషోస్తే
విన్యస్తం కనకశలాకయా మయా యత్ |
తన్న్యూనం మలినమపి త్వదక్షిసంగాత్
బ్రహ్మేంద్రాద్యభిలషణీయతామియాయ || ౧౮ ||
మంజీరే పదయోర్నిధాయ రుచిరాం విన్యస్య కాంచీం కటౌ
ముక్తాహారమురోజయోరనుపమాం నక్షత్రమాలాం గలే |
కేయూరాణి భుజేషు రత్నవలయశ్రేణీం కరేషు క్రమా-
-త్తాటంకే తవ కర్ణయోర్వినిదధే శీర్షే చ చూడామణిమ్ || ౧౯ ||
ధమ్మిల్లే తవ దేవి హేమకుసుమాన్యాధాయ ఫాలస్థలే
ముక్తారాజివిరాజమానతిలకం నాసాపుటే మౌక్తికమ్ |
మాతర్మౌక్తికజాలికాం చ కుచయోః సర్వాంగులీషూర్మికాః
కట్యాం కాంచనకింకిణీర్వినిదధే రత్నావతంసం శ్రుతౌ || ౨౦ ||
మాతః ఫాలతలే తవాతివిమలే కాశ్మీరకస్తూరికా-
-కర్పూరాగరుభిః కరోమి తిలకం దేహేఽంగరాగం తతః |
వక్షోజాదిషు యక్షకర్దమరసం సిక్త్వా చ పుష్పద్రవం
పాదౌ చందనలేపనాదిభిరహం సంపూజయామి క్రమాత్ || ౨౧ ||
రత్నాక్షతైస్త్వాం పరిపూజయామి
ముక్తాఫలైర్వా రుచిరైరవిద్ధైః |
అఖండితైర్దేవి యవాదిభిర్వా
కాశ్మీరపంకాంకితతండులైర్వా || ౨౨ ||
జనని చంపకతైలమిదం పురో
మృగమదోపయుతం పటవాసకమ్ |
సురభిగంధమిదం చ చతుఃసమం
సపది సర్వమిదం పరిగృహ్యతామ్ || ౨౩ ||
సీమంతే తే భగవతి మయా సాదరం న్యస్తమేత-
-త్సిందూరం మే హృదయకమలే హర్షవర్షం తనోతి |
బాలాదిత్యద్యుతిరివ సదా లోహితా యస్య కాంతీ-
-రంతర్ధ్వాంతం హరతి సకలం చేతసా చింతయైవ || ౨౪ ||
మందారకుందకరవీరలవంగపుష్పై-
-స్త్వాం దేవి సంతతమహం పరిపూజయామి |
జాతీజపావకులచంపకకేతకాది-
-నానావిధాని కుసుమాని చ తేఽర్పయామి || ౨౫ ||
మాలతీవకులహేమపుష్పికా-
-కాంచనారకరవీరకైతకైః |
కర్ణికారగిరికర్ణికాదిభిః
పూజయామి జగదంబ తే వపుః || ౨౬ ||
పారిజాతశతపత్రపాటలై-
-ర్మల్లికావకులచంపకాదిభిః |
అంబుజైః సుకుసుమైశ్చ సాదరం
పూజయామి జగదంబ తే వపుః || ౨౭ ||
లాక్షాసంమిలితైః సితాభ్రసహితైః శ్రీవాససంమిశ్రితైః
కర్పూరాకలితైః శిరైర్మధుయుతైర్గోసర్పిషా లోడితైః |
శ్రీఖండాగరుగుగ్గులుప్రభృతిభిర్నానావిధైర్వస్తుభి-
-ర్ధూపం తే పరికల్పయామి జనని స్నేహాత్త్వమంగీకురు || ౨౮ ||
రత్నాలంకృతహేమపాత్రనిహితైర్గోసర్పిషా లోడితై-
-ర్దీపైర్దీర్ఘతరాంధకారభిదురైర్బాలార్కకోటిప్రభైః |
ఆతామ్రజ్వలదుజ్జ్వలప్రవిలసద్రత్నప్రదీపైస్తథా
మాతస్త్వామహమాదరాదనుదినం నీరాజయామ్యుచ్చకైః || ౨౯ ||
మాతస్త్వాం దధిదుగ్ధపాయసమహాశాల్యన్నసంతానికాః
సూపాపూపసితాఘృతైః సవటకైః సక్షౌద్రరంభాఫలైః |
ఏలాజీరకహింగునాగరనిశాకుస్తుంభరీసంస్కృతైః
శాకైః సాకమహం సుధాధికరసైః సంతర్పయామ్యర్చయన్ || ౩౦ ||
సాపూపసూపదధిదుగ్ధసితాఘృతాని
సుస్వాదుభక్తపరమాన్నపురఃసరాణి |
శాకోల్లసన్మరిచిజీరకబాహ్లికాని
భక్ష్యాణి భుంక్ష్వ జగదంబ మయార్పితాని || ౩౧ ||
క్షీరమేతదిదముత్తమోత్తమం
ప్రాజ్యమాజ్యమిదముజ్జ్వలం మధు |
మాతరేతదమృతోపమం పయః
సంభ్రమేణ పరిపీయతాం ముహుః || ౩౨ ||
ఉష్ణోదకైః పాణియుగం ముఖం చ
ప్రక్షాల్య మాతః కలధౌతపాత్రే |
కర్పూరమిశ్రేణ సకుంకుమేన
హస్తౌ సముద్వర్తయ చందనేన || ౩౩ ||
అతిశీతముశీరవాసితం
తపనీయే కలశే నివేశితమ్ |
పటపూతమిదం జితామృతం
శుచి గంగాజలమంబ పీయతామ్ || ౩౪ ||
జంబ్వామ్రరంభాఫలసంయుతాని
ద్రాక్షాఫలక్షౌద్రసమన్వితాని |
సనారికేలాని సదాడిమాని
ఫలాని తే దేవి సమర్పయామి || ౩౫ ||
కూశ్మాండకోశాతకిసంయుతాని
జంబీరనారంగసమన్వితాని |
సబీజపూరాణి సబాదరాణి
ఫలాని తే దేవి సమర్పయామి || ౩౬ ||
కర్పూరేణ యుతైర్లవంగసహితైస్తక్కోలచూర్ణాన్వితైః
సుస్వాదుక్రముకైః సగౌరఖదిరైః సుస్నిగ్ధజాతీఫలైః |
మాతః కైతకపత్రపాండురుచిభిస్తాంబూలవల్లీదలైః
సానందం ముఖమండనార్థమతులం తాంబూలమంగీకురు || ౩౭ ||
ఏలాలవంగాదిసమన్వితాని
తక్కోలకర్పూరవిమిశ్రితాని |
తాంబూలవల్లీదలసంయుతాని
పూగాని తే దేవి సమర్పయామి || ౩౮ ||
తాంబూలనిర్జితసుతప్తసువర్ణవర్ణం
స్వర్ణాక్తపూగఫలమౌక్తికచూర్ణయుక్తమ్ |
సౌవర్ణపాత్రనిహితం ఖదిరేన సార్ధం
తాంబూలమంబ వదనాంబురుహే గృహాణ || ౩౯ ||
మహతి కనకపాత్రే స్థాపయిత్వా విశాలాన్
డమరుసదృశరూపాన్బద్ధగోధూమదీపాన్ |
బహుఘృతమథ తేషు న్యస్య దీపాన్ప్రకృష్టా-
-న్భువనజనని కుర్వే నిత్యమారార్తికం తే || ౪౦ ||
సవినయమథ దత్వా జానుయుగ్మం ధరణ్యాం
సపది శిరసి ధృత్వా పాత్రమారార్తికస్య |
ముఖకమలసమీపే తేఽంబ సార్థం త్రివారం
భ్రమయతి మయి భూయాత్తే కృపార్ద్రః కటాక్షః || ౪౧ ||
అథ బహుమణిమిశ్రైర్మౌక్తికైస్త్వాం వికీర్య
త్రిభువనకమనీయైః పూజయిత్వా చ వస్త్రైః |
మిలితవివిధముక్తాం దివ్యమాణిక్యయుక్తాం
జనని కనకవృష్టిం దక్షిణాం తేఽర్పయామి || ౪౨ ||
మాతః కాంచనదండమండితమిదం పూర్ణేందుబింబప్రభం
నానారత్నవిశోభిహేమకలశం లోకత్రయాహ్లాదకమ్ |
భాస్వన్మౌక్తికజాలికాపరివృతం ప్రీత్యాత్మహస్తే ధృతం
ఛత్రం తే పరికల్పయామి శిరసి త్వష్ట్రా స్వయం నిర్మితమ్ || ౪౩ ||
శరదిందుమరీచిగౌరవర్ణై-
-ర్మణిముక్తావిలసత్సువర్ణదండైః |
జగదంబ విచిత్రచామరైస్త్వా-
-మహమానందభరేణ వీజయామి || ౪౪ ||
మార్తాండమండలనిభో జగదంబ యోఽయం
భక్త్యా మయా మణిమయో ముకురోఽర్పితస్తే |
పూర్ణేందుబింబరుచిరం వదనం స్వకీయ-
-మస్మిన్విలోకయ విలోలవిలోచనే త్వమ్ || ౪౫ ||
ఇంద్రాదయో నతినతైర్మకుటప్రదీపై-
-ర్నీరాజయంతి సతతం తవ పాదపీఠమ్ |
తస్మాదహం తవ సమస్తశరీరమేత-
-న్నీరాజయామి జగదంబ సహస్రదీపైః || ౪౬ ||
ప్రియగతిరతితుంగో రత్నపల్యాణయుక్తః
కనకమయవిభూషః స్నిగ్ధగంభీరఘోషః |
భగవతి కలితోఽయం వాహనార్థం మయా తే
తురగశతసమేతో వాయువేగస్తురంగః || ౪౭ ||
మధుకరవృతకుంభన్యస్తసిందూరరేణుః
కనకకలితఘంటాకింకణీశోభికంఠః |
శ్రవణయుగలచంచచ్చామరో మేఘతుల్యో
జనని తవ ముదే స్యాన్మత్తమాతంగ ఏషః || ౪౮ ||
ద్రుతతరతురగైర్విరాజమానం
మణిమయచక్రచతుష్టయేన యుక్తమ్ |
కనకమయమముం వితానవంతం
భగవతి తే హి రథం సమర్పయామి || ౪౯ ||
హయగజరథపత్తిశోభమానం
దిశి దిశి దుందుభిమేఘనాదయుక్తమ్ |
అతిబహు చతురంగసైన్యమేత-
-ద్భగవతి భక్తిభరేణ తేఽర్పయామి || ౫౦ ||
పరిఘీకృతసప్తసాగరం
బహుసంపత్సహితం మయాంబ తే విపులమ్ |
ప్రబలం ధరణీతలాభిధం
దృఢదుర్గం నిఖిలం సమర్పయామి || ౫౧ ||
శతపత్రయుతైః స్వభావశీతై-
-రతిసౌరభ్యయుతైః పరాగపీతైః |
భ్రమరీముఖరీకృతైరనంతై-
-ర్వ్యజనైస్త్వాం జగదంబ వీజయామి || ౫౨ ||
భ్రమరలులితలోలకుంతలాలీ-
-విగలితమాల్యవికీర్ణరంగభూమిః |
ఇయమతిరుచిరా నటీ నటంతీ
తవ హృదయే ముదమాతనోతు మాతః || ౫౩ ||
ముఖనయనవిలాసలోలవేణీ-
-విలసితనిర్జితలోలభృంగమాలాః |
యువజనసుఖకారిచారులీలా
భగవతి తే పురతో నటంతి బాలాః || ౫౪ ||
భ్రమదలికులతుల్యాలోలధమ్మిల్లభారాః
స్మితముఖకమలోద్యద్దివ్యలావణ్యపూరాః |
అనుపమితసువేషా వారయోషా నటంతి
పరభృతకలకంఠ్యో దేవి దైన్యం ధునోతు || ౫౫ ||
డమరుడిండిమజర్ఝరఝల్లరీ-
-మృదురవద్రగడద్ద్రగడాదయః |
ఝటితి ఝాంకృతఝాంకృతఝాంకృతై-
-ర్బహుదయం హృదయం సుఖయంతు తే || ౫౬ ||
విపంచీషు సప్తస్వరాన్వాదయంత్య-
-స్తవ ద్వారి గాయంతి గంధర్వకన్యాః |
క్షణం సావధానేన చిత్తేన మాతః
సమాకర్ణయ త్వం మయా ప్రార్థితాసి || ౫౭ ||
అభినయకమనీయైర్నర్తనైర్నర్తకీనాం
క్షణమపి రమయిత్వా చేత ఏతత్త్వదీయమ్ |
స్వయమహమతిచిత్రైర్నృత్తవాదిత్రగీతై-
-ర్భగవతి భవదీయం మానసం రంజయామి || ౫౮ ||
తవ దేవి గుణానువర్ణనే
చతురా నో చతురాననాదయః |
తదిహైకముఖేషు జంతుషు
స్తవనం కస్తవ కర్తుమీశ్వరః || ౫౯ ||
పదే పదే యత్పరిపూజకేభ్యః
సద్యోఽశ్వమేధాదిఫలం దదాతి |
తత్సర్వపాపక్షయ హేతుభూతం
ప్రదక్షిణం తే పరితః కరోమి || ౬౦ ||
రక్తోత్పలారక్తలతాప్రభాభ్యాం
ధ్వజోర్ధ్వరేఖాకులిశాంకితాభ్యామ్ |
అశేషబృందారకవందితాభ్యాం
నమో భవానీపదపంకజాభ్యామ్ || ౬౧ ||
చరణనలినయుగ్మం పంకజైః పూజయిత్వా
కనకకమలమాలాం కంఠదేశేఽర్పయిత్వా |
శిరసి వినిహితోఽయం రత్నపుష్పాంజలిస్తే
హృదయకమలమధ్యే దేవి హర్షం తనోతు || ౬౨ ||
అథ మణిమయమంచకాభిరామే
కనకమయవితానరాజమానే |
ప్రసరదగరుధూపధూపితేఽస్మి-
-న్భగవతి భవనేఽస్తు తే నివాసః || ౬౩ ||
ఏతస్మిన్మణిఖచితే సువర్ణపీఠే
త్రైలోక్యాభయవరదౌ నిధాయ హస్తౌ |
విస్తీర్ణే మృదులతరోత్తరచ్ఛదేఽస్మి-
-న్పర్యంకే కనకమయే నిషీద మాతః || ౬౪ ||
తవ దేవి సరోజచిహ్నయోః
పదయోర్నిర్జితపద్మరాగయోః |
అతిరక్తతరైరలక్తకైః
పునరుక్తాం రచయామి రక్తతామ్ || ౬౫ ||
అథ మాతరుశీరవాసితం
నిజతాంబూలరసేన రంజితమ్ |
తపనీయమయే హి పట్టకే
ముఖగండూషజలం విధీయతామ్ || ౬౬ ||
క్షణమథ జగదంబ మంచకేఽస్మి-
-న్మృదుతలతూలికయా విరాజమానే |
అతిరహసి ముదా శివేన సార్ధం
సుఖశయనం కురు తత్ర మాం స్మరంతీ || ౬౭ ||
ముక్తాకుందేందుగౌరాం మణిమయమకుటాం రత్నతాటంకయుక్తా-
-మక్షస్రక్పుష్పహస్తామభయవరకరాం చంద్రచూడాం త్రినేత్రామ్ |
నానాలంకారయుక్తాం సురమకుటమణిద్యోతితస్వర్ణపీఠాం
సానందాం సుప్రసన్నాం త్రిభువనజననీం చేతసా చింతయామి || ౬౮ ||
ఏషా భక్త్యా తవ విరచితా యా మయా దేవి పూజా
స్వీకృత్యైనాం సపది సకలాన్మేఽపరాధాన్ క్షమస్వ |
న్యూనం యత్తత్తవ కరుణయా పూర్ణతామేతు సద్యః
సానందం మే హృదయకమలే తేఽస్తు నిత్యం నివాసః || ౬౯ ||
పూజామిమాం యః పఠతి ప్రభాతే
మధ్యాహ్నకాలే యది వా ప్రదోషే |
ధర్మార్థకామాన్పురుషోఽభ్యుపైతి
దేహావసానే శివభావమేతి || ౭౦ ||
పూజామిమాం పఠేన్నిత్యం పూజాం కర్తుమనీశ్వరః |
పూజాఫలమవాప్నోతి వాంఛితార్థం చ విందతి || ౭౧ ||
ప్రత్యహం భక్తిసంయుక్తో యః పూజనమిదం పఠేత్ |
వాగ్వాదిన్యాః ప్రసాదేన వత్సరాత్స కవిర్భవేత్ || ౭౨ ||
ఇతి శ్రీమత్పరమహంసపరివ్రాజకాచార్యస్య శ్రీగోవిందభగవత్పూజ్యపాదశిష్యస్య శ్రీమచ్ఛంకరభగవతః కృతౌ దేవీ చతుఃషష్ట్యుపచారపూజా స్తోత్రమ్ |
Devi Chatushasti Upachara Puja Stotram
uṣasi māgadhamaṅgalagāyanai-
-rjhaṭiti jāgr̥hi jāgr̥hi jāgr̥hi |
atikr̥pārdrakaṭākṣanirīkṣaṇai-
-rjagadidaṁ jagadamba sukhīkuru || 1 ||
kanakamayavitardiśōbhamānaṁ
diśi diśi pūrṇasuvarṇakumbhayuktam |
maṇimayamaṇṭapamadhyamēhi māta-
-rmayi kr̥payāśu samarcanaṁ grahītum || 2 ||
kanakakalaśaśōbhamānaśīrṣaṁ
jaladharalambi samullasatpatākam |
bhagavati tava saṁnivāsahētō-
-rmaṇimayamandiramētadarpayāmi || 3 ||
tapanīyamayī sutūlikā
kamanīyā mr̥dulōttaracchadā |
navaratnavibhūṣitā mayā
śibikēyaṁ jagadamba tē:’rpitā || 4 ||
kanakamayavitardisthāpitē tūlikāḍhyē
vividhakusumakīrṇē kōṭibālārkavarṇē |
bhagavati ramaṇīyē ratnasiṁhāsanē:’smi-
-nnupaviśa padayugmaṁ hēmapīṭhē nidhāya || 5 ||
maṇimauktikanirmitaṁ mahāntaṁ
kanakastambhacatuṣṭayēna yuktam |
kamanīyatamaṁ bhavāni tubhyaṁ
navamullōcamahaṁ samarpayāmi || 6 ||
dūrvayā sarasijānvitaviṣṇu-
-krāntayā ca sahitaṁ kusumāḍhyam |
padmayugmasadr̥śē padayugmē
pādyamētadurarīkuru mātaḥ || 7 ||
gandhapuṣpayavasarṣapadūrvā-
-samyutaṁ tilakuśākṣatamiśram |
hēmapātranihitaṁ saha ratnai-
-rarghyamētadurarīkuru mātaḥ || 8 ||
jalajadyutinā karēṇa jātī-
-phalatakkōlalavaṅgagandhayuktaiḥ |
amr̥tairamr̥tairivātiśītai-
-rbhagavatyācamanaṁ vidhīyatām || 9 ||
nihitaṁ kanakasya sampuṭē
pihitaṁ ratnapidhānakēna yat |
tadidaṁ jagadamba tē:’rpitaṁ
madhuparkaṁ janani pragr̥hyatām || 10 ||
ētaccampakatailamamba vividhaiḥ puṣpairmuhurvāsitaṁ
nyastaṁ ratnamayē suvarṇacaṣakē bhr̥ṅgairbhramadbhirvr̥tam |
sānandaṁ surasundarībhirabhitō hastairdhr̥taṁ tē mayā
kēśēṣu bhramarabhramēṣu sakalēṣvaṅgēṣu cālipyatē || 11 ||
mātaḥ kuṅkumapaṅkanirmitamidaṁ dēhē tavōdvartanaṁ
bhaktyāhaṁ kalayāmi hēmarajasā saṁmiśritaṁ kēsaraiḥ |
kēśānāmalakairviśōdhya viśadānkastūrikōdañcitaiḥ
snānaṁ tē navaratnakumbhasahitaiḥ saṁvāsitōṣṇōdakaiḥ || 12 ||
dadhidugdhaghr̥taiḥ samākṣikaiḥ
sitayā śarkarayā samanvitaiḥ |
snapayāmi tavāhamādarā-
-jjanani tvāṁ punaruṣṇavāribhiḥ || 13 ||
ēlōśīrasuvāsitaiḥ sakusumairgaṅgāditīrthōdakai-
-rmāṇikyāmalamauktikāmr̥tarasaiḥ svacchaiḥ suvarṇōdakaiḥ |
mantrānvaidikatāntrikānparipaṭhansānandamatyādarā-
-tsnānaṁ tē parikalpayāmi janani snēhāttvamaṅgīkuru || 14 ||
bālārkadyuti dāḍimīyakusumapraspardhi sarvōttamaṁ
mātastvaṁ paridhēhi divyavasanaṁ bhaktyā mayā kalpitam |
muktābhirgrathitaṁ sukañcukamidaṁ svīkr̥tya pītaprabhaṁ
taptasvarṇasamānavarṇamatulaṁ prāvarṇamaṅgīkuru || 15 ||
navaratnamayē mayārpitē
kamanīyē tapanīyapādukē |
savilāsamidaṁ padadvayaṁ
kr̥payā dēvi tayōrnidhīyatām || 16 ||
bahubhiragarudhūpaiḥ sādaraṁ dhūpayitvā
bhagavati tava kēśāṅkaṅkatairmārjayitvā |
surabhibhiraravindaiścampakaiścārcayitvā
jhaṭiti kanakasūtrairjūṭayanvēṣṭayāmi || 17 ||
sauvīrāñjanamidamamba cakṣuṣōstē
vinyastaṁ kanakaśalākayā mayā yat |
tannyūnaṁ malinamapi tvadakṣisaṅgāt
brahmēndrādyabhilaṣaṇīyatāmiyāya || 18 ||
mañjīrē padayōrnidhāya rucirāṁ vinyasya kāñcīṁ kaṭau
muktāhāramurōjayōranupamāṁ nakṣatramālāṁ galē |
kēyūrāṇi bhujēṣu ratnavalayaśrēṇīṁ karēṣu kramā-
-ttāṭaṅkē tava karṇayōrvinidadhē śīrṣē ca cūḍāmaṇim || 19 ||
dhammillē tava dēvi hēmakusumānyādhāya phālasthalē
muktārājivirājamānatilakaṁ nāsāpuṭē mauktikam |
mātarmauktikajālikāṁ ca kucayōḥ sarvāṅgulīṣūrmikāḥ
kaṭyāṁ kāñcanakiṅkiṇīrvinidadhē ratnāvataṁsaṁ śrutau || 20 ||
mātaḥ phālatalē tavātivimalē kāśmīrakastūrikā-
-karpūrāgarubhiḥ karōmi tilakaṁ dēhē:’ṅgarāgaṁ tataḥ |
vakṣōjādiṣu yakṣakardamarasaṁ siktvā ca puṣpadravaṁ
pādau candanalēpanādibhirahaṁ sampūjayāmi kramāt || 21 ||
ratnākṣataistvāṁ paripūjayāmi
muktāphalairvā rucirairaviddhaiḥ |
akhaṇḍitairdēvi yavādibhirvā
kāśmīrapaṅkāṅkitataṇḍulairvā || 22 ||
janani campakatailamidaṁ purō
mr̥gamadōpayutaṁ paṭavāsakam |
surabhigandhamidaṁ ca catuḥsamaṁ
sapadi sarvamidaṁ parigr̥hyatām || 23 ||
sīmantē tē bhagavati mayā sādaraṁ nyastamēta-
-tsindūraṁ mē hr̥dayakamalē harṣavarṣaṁ tanōti |
bālādityadyutiriva sadā lōhitā yasya kāntī-
-rantardhvāntaṁ harati sakalaṁ cētasā cintayaiva || 24 ||
mandārakundakaravīralavaṅgapuṣpai-
-stvāṁ dēvi santatamahaṁ paripūjayāmi |
jātījapāvakulacampakakētakādi-
-nānāvidhāni kusumāni ca tē:’rpayāmi || 25 ||
mālatīvakulahēmapuṣpikā-
-kāñcanārakaravīrakaitakaiḥ |
karṇikāragirikarṇikādibhiḥ
pūjayāmi jagadamba tē vapuḥ || 26 ||
pārijātaśatapatrapāṭalai-
-rmallikāvakulacampakādibhiḥ |
ambujaiḥ sukusumaiśca sādaraṁ
pūjayāmi jagadamba tē vapuḥ || 27 ||
lākṣāsaṁmilitaiḥ sitābhrasahitaiḥ śrīvāsasaṁmiśritaiḥ
karpūrākalitaiḥ śirairmadhuyutairgōsarpiṣā lōḍitaiḥ |
śrīkhaṇḍāgarugugguluprabhr̥tibhirnānāvidhairvastubhi-
-rdhūpaṁ tē parikalpayāmi janani snēhāttvamaṅgīkuru || 28 ||
ratnālaṅkr̥tahēmapātranihitairgōsarpiṣā lōḍitai-
-rdīpairdīrghatarāndhakārabhidurairbālārkakōṭiprabhaiḥ |
ātāmrajvaladujjvalapravilasadratnapradīpaistathā
mātastvāmahamādarādanudinaṁ nīrājayāmyuccakaiḥ || 29 ||
mātastvāṁ dadhidugdhapāyasamahāśālyannasantānikāḥ
sūpāpūpasitāghr̥taiḥ savaṭakaiḥ sakṣaudrarambhāphalaiḥ |
ēlājīrakahiṅgunāgaraniśākustumbharīsaṁskr̥taiḥ
śākaiḥ sākamahaṁ sudhādhikarasaiḥ santarpayāmyarcayan || 30 ||
sāpūpasūpadadhidugdhasitāghr̥tāni
susvādubhaktaparamānnapuraḥsarāṇi |
śākōllasanmaricijīrakabāhlikāni
bhakṣyāṇi bhuṅkṣva jagadamba mayārpitāni || 31 ||
kṣīramētadidamuttamōttamaṁ
prājyamājyamidamujjvalaṁ madhu |
mātarētadamr̥tōpamaṁ payaḥ
sambhramēṇa paripīyatāṁ muhuḥ || 32 ||
uṣṇōdakaiḥ pāṇiyugaṁ mukhaṁ ca
prakṣālya mātaḥ kaladhautapātrē |
karpūramiśrēṇa sakuṅkumēna
hastau samudvartaya candanēna || 33 ||
atiśītamuśīravāsitaṁ
tapanīyē kalaśē nivēśitam |
paṭapūtamidaṁ jitāmr̥taṁ
śuci gaṅgājalamamba pīyatām || 34 ||
jambvāmrarambhāphalasamyutāni
drākṣāphalakṣaudrasamanvitāni |
sanārikēlāni sadāḍimāni
phalāni tē dēvi samarpayāmi || 35 ||
kūśmāṇḍakōśātakisamyutāni
jambīranāraṅgasamanvitāni |
sabījapūrāṇi sabādarāṇi
phalāni tē dēvi samarpayāmi || 36 ||
karpūrēṇa yutairlavaṅgasahitaistakkōlacūrṇānvitaiḥ
susvādukramukaiḥ sagaurakhadiraiḥ susnigdhajātīphalaiḥ |
mātaḥ kaitakapatrapāṇḍurucibhistāmbūlavallīdalaiḥ
sānandaṁ mukhamaṇḍanārthamatulaṁ tāmbūlamaṅgīkuru || 37 ||
ēlālavaṅgādisamanvitāni
takkōlakarpūravimiśritāni |
tāmbūlavallīdalasamyutāni
pūgāni tē dēvi samarpayāmi || 38 ||
tāmbūlanirjitasutaptasuvarṇavarṇaṁ
svarṇāktapūgaphalamauktikacūrṇayuktam |
sauvarṇapātranihitaṁ khadirēna sārdhaṁ
tāmbūlamamba vadanāmburuhē gr̥hāṇa || 39 ||
mahati kanakapātrē sthāpayitvā viśālān
ḍamarusadr̥śarūpānbaddhagōdhūmadīpān |
bahughr̥tamatha tēṣu nyasya dīpānprakr̥ṣṭā-
-nbhuvanajanani kurvē nityamārārtikaṁ tē || 40 ||
savinayamatha datvā jānuyugmaṁ dharaṇyāṁ
sapadi śirasi dhr̥tvā pātramārārtikasya |
mukhakamalasamīpē tē:’mba sārthaṁ trivāraṁ
bhramayati mayi bhūyāttē kr̥pārdraḥ kaṭākṣaḥ || 41 ||
atha bahumaṇimiśrairmauktikaistvāṁ vikīrya
tribhuvanakamanīyaiḥ pūjayitvā ca vastraiḥ |
militavividhamuktāṁ divyamāṇikyayuktāṁ
janani kanakavr̥ṣṭiṁ dakṣiṇāṁ tē:’rpayāmi || 42 ||
mātaḥ kāñcanadaṇḍamaṇḍitamidaṁ pūrṇēndubimbaprabhaṁ
nānāratnaviśōbhihēmakalaśaṁ lōkatrayāhlādakam |
bhāsvanmauktikajālikāparivr̥taṁ prītyātmahastē dhr̥taṁ
chatraṁ tē parikalpayāmi śirasi tvaṣṭrā svayaṁ nirmitam || 43 ||
śaradindumarīcigauravarṇai-
-rmaṇimuktāvilasatsuvarṇadaṇḍaiḥ |
jagadamba vicitracāmaraistvā-
-mahamānandabharēṇa vījayāmi || 44 ||
mārtāṇḍamaṇḍalanibhō jagadamba yō:’yaṁ
bhaktyā mayā maṇimayō mukurō:’rpitastē |
pūrṇēndubimbaruciraṁ vadanaṁ svakīya-
-masminvilōkaya vilōlavilōcanē tvam || 45 ||
indrādayō natinatairmakuṭapradīpai-
-rnīrājayanti satataṁ tava pādapīṭham |
tasmādahaṁ tava samastaśarīramēta-
-nnīrājayāmi jagadamba sahasradīpaiḥ || 46 ||
priyagatiratituṅgō ratnapalyāṇayuktaḥ
kanakamayavibhūṣaḥ snigdhagambhīraghōṣaḥ |
bhagavati kalitō:’yaṁ vāhanārthaṁ mayā tē
turagaśatasamētō vāyuvēgasturaṅgaḥ || 47 ||
madhukaravr̥takumbhanyastasindūrarēṇuḥ
kanakakalitaghaṇṭākiṅkaṇīśōbhikaṇṭhaḥ |
śravaṇayugalacañcaccāmarō mēghatulyō
janani tava mudē syānmattamātaṅga ēṣaḥ || 48 ||
drutataraturagairvirājamānaṁ
maṇimayacakracatuṣṭayēna yuktam |
kanakamayamamuṁ vitānavantaṁ
bhagavati tē hi rathaṁ samarpayāmi || 49 ||
hayagajarathapattiśōbhamānaṁ
diśi diśi dundubhimēghanādayuktam |
atibahu caturaṅgasainyamēta-
-dbhagavati bhaktibharēṇa tē:’rpayāmi || 50 ||
parighīkr̥tasaptasāgaraṁ
bahusampatsahitaṁ mayāmba tē vipulam |
prabalaṁ dharaṇītalābhidhaṁ
dr̥ḍhadurgaṁ nikhilaṁ samarpayāmi || 51 ||
śatapatrayutaiḥ svabhāvaśītai-
-ratisaurabhyayutaiḥ parāgapītaiḥ |
bhramarīmukharīkr̥tairanantai-
-rvyajanaistvāṁ jagadamba vījayāmi || 52 ||
bhramaralulitalōlakuntalālī-
-vigalitamālyavikīrṇaraṅgabhūmiḥ |
iyamatirucirā naṭī naṭantī
tava hr̥dayē mudamātanōtu mātaḥ || 53 ||
mukhanayanavilāsalōlavēṇī-
-vilasitanirjitalōlabhr̥ṅgamālāḥ |
yuvajanasukhakāricārulīlā
bhagavati tē puratō naṭanti bālāḥ || 54 ||
bhramadalikulatulyālōladhammillabhārāḥ
smitamukhakamalōdyaddivyalāvaṇyapūrāḥ |
anupamitasuvēṣā vārayōṣā naṭanti
parabhr̥takalakaṇṭhyō dēvi dainyaṁ dhunōtu || 55 ||
ḍamaruḍiṇḍimajarjharajhallarī-
-mr̥duravadragaḍaddragaḍādayaḥ |
jhaṭiti jhāṅkr̥tajhāṅkr̥tajhāṅkr̥tai-
-rbahudayaṁ hr̥dayaṁ sukhayantu tē || 56 ||
vipañcīṣu saptasvarānvādayantya-
-stava dvāri gāyanti gandharvakanyāḥ |
kṣaṇaṁ sāvadhānēna cittēna mātaḥ
samākarṇaya tvaṁ mayā prārthitāsi || 57 ||
abhinayakamanīyairnartanairnartakīnāṁ
kṣaṇamapi ramayitvā cēta ētattvadīyam |
svayamahamaticitrairnr̥ttavāditragītai-
-rbhagavati bhavadīyaṁ mānasaṁ rañjayāmi || 58 ||
tava dēvi guṇānuvarṇanē
caturā nō caturānanādayaḥ |
tadihaikamukhēṣu jantuṣu
stavanaṁ kastava kartumīśvaraḥ || 59 ||
padē padē yatparipūjakēbhyaḥ
sadyō:’śvamēdhādiphalaṁ dadāti |
tatsarvapāpakṣaya hētubhūtaṁ
pradakṣiṇaṁ tē paritaḥ karōmi || 60 ||
raktōtpalāraktalatāprabhābhyāṁ
dhvajōrdhvarēkhākuliśāṅkitābhyām |
aśēṣabr̥ndārakavanditābhyāṁ
namō bhavānīpadapaṅkajābhyām || 61 ||
caraṇanalinayugmaṁ paṅkajaiḥ pūjayitvā
kanakakamalamālāṁ kaṇṭhadēśē:’rpayitvā |
śirasi vinihitō:’yaṁ ratnapuṣpāñjalistē
hr̥dayakamalamadhyē dēvi harṣaṁ tanōtu || 62 ||
atha maṇimayamañcakābhirāmē
kanakamayavitānarājamānē |
prasaradagarudhūpadhūpitē:’smi-
-nbhagavati bhavanē:’stu tē nivāsaḥ || 63 ||
ētasminmaṇikhacitē suvarṇapīṭhē
trailōkyābhayavaradau nidhāya hastau |
vistīrṇē mr̥dulatarōttaracchadē:’smi-
-nparyaṅkē kanakamayē niṣīda mātaḥ || 64 ||
tava dēvi sarōjacihnayōḥ
padayōrnirjitapadmarāgayōḥ |
atiraktatarairalaktakaiḥ
punaruktāṁ racayāmi raktatām || 65 ||
atha mātaruśīravāsitaṁ
nijatāmbūlarasēna rañjitam |
tapanīyamayē hi paṭ-ṭakē
mukhagaṇḍūṣajalaṁ vidhīyatām || 66 ||
kṣaṇamatha jagadamba mañcakē:’smi-
-nmr̥dutalatūlikayā virājamānē |
atirahasi mudā śivēna sārdhaṁ
sukhaśayanaṁ kuru tatra māṁ smarantī || 67 ||
muktākundēndugaurāṁ maṇimayamakuṭāṁ ratnatāṭaṅkayuktā-
-makṣasrakpuṣpahastāmabhayavarakarāṁ candracūḍāṁ trinētrām |
nānālaṅkārayuktāṁ suramakuṭamaṇidyōtitasvarṇapīṭhāṁ
sānandāṁ suprasannāṁ tribhuvanajananīṁ cētasā cintayāmi || 68 ||
ēṣā bhaktyā tava viracitā yā mayā dēvi pūjā
svīkr̥tyaināṁ sapadi sakalānmē:’parādhān kṣamasva |
nyūnaṁ yattattava karuṇayā pūrṇatāmētu sadyaḥ
sānandaṁ mē hr̥dayakamalē tē:’stu nityaṁ nivāsaḥ || 69 ||
pūjāmimāṁ yaḥ paṭhati prabhātē
madhyāhnakālē yadi vā pradōṣē |
dharmārthakāmānpuruṣō:’bhyupaiti
dēhāvasānē śivabhāvamēti || 70 ||
pūjāmimāṁ paṭhēnnityaṁ pūjāṁ kartumanīśvaraḥ |
pūjāphalamavāpnōti vāñchitārthaṁ ca vindati || 71 ||
pratyahaṁ bhaktisamyuktō yaḥ pūjanamidaṁ paṭhēt |
vāgvādinyāḥ prasādēna vatsarātsa kavirbhavēt || 72 ||
iti śrīmatparamahaṁsaparivrājakācāryasya śrīgōvindabhagavatpūjyapādaśiṣyasya śrīmacchaṅkarabhagavataḥ kr̥tau dēvī catuḥṣaṣṭyupacārapūjā stōtram |
