పంచస్తవి – 5 సకలజననీస్తవః స్తోత్రం Panchastavi 5 Sakalajanani Stava in telugu lo Panchastavi 5 Sakalajanani Stava telugu pdf down load అవసరం లేకుండా Panchastavi 5 Sakalajanani lyrics నేరుగా భక్తులు ఇన్ తెలుగులో పారాయణం చెయ్యండి
పంచస్తవి 5 సకలజననీస్తవః
అజానంతో యాంతి క్షయమవశమన్యోన్యకలహై-
-రమీ మాయాగ్రంథౌ తవ పరిలుఠంతః సమయినః |
జగన్మాతర్జన్మజ్వరభయతమః కౌముది వయం
నమస్తే కుర్వాణాః శరణముపయామో భగవతీమ్ || ౧ ||
వచస్తర్కాగమ్యస్వరసపరమానందవిభవ-
-ప్రబోధాకారాయ ద్యుతితులితనీలోత్పలరుచే |
శివాద్యారాధ్యాయ స్తనభరవినమ్రాయ సతతం
నమస్తస్మై కస్మైచన భవతు ముగ్ధాయ మహసే || ౨ ||
అనాద్యంతాభేదప్రణయరసికాపి ప్రణయినీ
శివస్యాసీర్యత్త్వం పరిణయవిధౌ దేవి గృహిణీ |
సవిత్రీ భూతానామపి యదుదభూః శైలతనయా
తదేతత్సంసారప్రణయనమహానాటకముఖమ్ || ౩ ||
బ్రువంత్యేకే తత్త్వం భగవతి సదన్యే విదురస-
-త్పరే మాతః ప్రాహుస్తవ సదసదన్యే సుకవయః |
పరే నైతత్సర్వం సమభిదధతే దేవి సుధియ-
-స్తదేతత్త్వన్మాయావిలసితమశేషం నను శివే || ౪ ||
లుఠద్గుంజాహారస్తనభరనమన్మధ్యలతికా-
-ముదంచద్ధర్మాంభః కణగుణితవక్త్రాంబుజరుచమ్ |
శివం పార్థత్రాణప్రవణమృగయాకారగుణితం
శివామన్వగ్యాంతీం శరణమహమన్వేమి శబరీమ్ || ౫ ||
మిథః కేశాకేశిప్రథననిధనాస్తర్కఘటనాః
బహుశ్రద్ధాభక్తిప్రణతివిషయాః శాస్త్రవిధయః |
ప్రసీద ప్రత్యక్షీభవ గిరిసుతే దేహి శరణం
నిరాలంబం చేతః పరిలుఠతి పారిప్లవమిదమ్ || ౬ ||
శునాం వా వహ్నేర్వా ఖగపరిషదో వా యదశనం
కదా కేన క్వేతి క్వచిదపి న కశ్చిత్కలయతి |
అముష్మిన్విశ్వాసం విజహిహి మమాహ్నాయ వపుషి
ప్రపద్యేథాశ్చేతః సకలజననీమేవ శరణమ్ || ౭ ||
తటిత్కోటిజ్యోతిర్ద్యుతిదలితషడ్గ్రంథిగహనం
ప్రవిష్టం స్వాధారం పునరపి సుధావృష్టివపుషా |
కిమప్యష్టావింశత్కిరణసకలీభూతమనిశం
భజే ధామ శ్యామం కుచభరనతం బర్బరకచమ్ || ౮ ||
చతుష్పత్రాంతః షడ్దలపుటభగాంతస్త్రివలయ-
-స్ఫురద్విద్యుద్వహ్నిద్యుమణినియుతాభద్యుతిలతే |
షడశ్రం భిత్త్వాదౌ దశదలమథ ద్వాదశదలం
కలాశ్రం చ ద్వ్యశ్రం గతవతి నమస్తే గిరిసుతే || ౯ ||
కులం కేచిత్ప్రాహుర్వపురకులమన్యే తవ బుధాః
పరే తత్సంభేదం సమభిదధతే కౌలమపరే |
చతుర్ణామప్యేషాముపరి కిమపి ప్రాహురపరే
మహామాయే తత్త్వం తవ కథమమీ నిశ్చినుమహే || ౧౦ ||
షడధ్వారణ్యానీం ప్రలయరవికోటిప్రతిరుచా
రుచా భస్మీకృత్య స్వపదకమలప్రహ్వశిరసామ్ |
వితన్వానః శైవం కిమపి వపురిందీవరరుచిః
కుచాభ్యామానమ్రస్తవ పురుషకారో విజయతే || ౧౧ ||
ప్రకాశానందాభ్యామవిదితచరీం మధ్యపదవీం
ప్రవిశ్యైతద్ద్వంద్వం రవిశశిసమాఖ్యం కబలయన్ |
ప్రపద్యోర్ధ్వం నాదం లయదహనభస్మీకృతకులః
ప్రసాదాత్తే జంతుః శివమకులమంబ ప్రవిశతి || ౧౨ ||
మనుష్యాస్తిర్యంచో మరుత ఇతి లోకత్రయమిదం
భవాంభోధౌ మగ్నం త్రిగుణలహరీకోటిలుఠితమ్ |
కటాక్షశ్చేద్యత్ర క్వచన తవ మాతః కరుణయా
శరీరీ సద్యోఽయం వ్రజతి పరమానందతనుతామ్ || ౧౩ ||
ప్రియంగుశ్యామాంగీమరుణతరవాసం కిసలయాం
సమున్మీలన్ముక్తాఫలవహలనేపథ్యసుభగామ్ |
స్తనద్వంద్వస్ఫారస్తబకనమితాం కల్పలతికాం
సకృద్ధ్యాయంతస్త్వాం దధతి శివచింతామణిపదమ్ || ౧౪ ||
షడాధారావర్తైరపరిమితమంత్రోర్మిపటలైః
లసన్ముద్రాఫేనైర్బహువిధలసద్దైవతఝషైః |
క్రమస్రోతోభిస్త్వం వహసి పరనాదామృతనదీ
భవాని ప్రత్యగ్రా శివచిదమృతాబ్ధిప్రణయినీ || ౧౫ ||
మహీపాథోవహ్నిశ్వసనవియదాత్మేందురవిభి-
-ర్వపుర్భిగ్రస్తాశైరపి తవ కియానంబ మహిమా |
అమూన్యాలోక్యంతే భగవతి న కుత్రాప్యణుతమా-
-మవస్థాం ప్రాప్తాని త్వయి తు పరమవ్యోమవపుషి || ౧౬ ||
కలామాజ్ఞాం ప్రజ్ఞాం సమయమనుభూతిం సమరసం
గురుం పారంపర్యం వినయముపదేశం శివపదమ్ |
ప్రమాణం నిర్వాణం ప్రకృతిమభిభూతిం పరగుహాం
విధిం విద్యామాహుః సకలజననీమేవ మునయః || ౧౭ ||
ప్రలీనే శబ్దౌఘే తదను విరతే బిందువిభవే
తతస్తత్త్వే చాష్టధ్వనిభిరనపాయిన్యధిగతే |
శ్రితే శాక్తే పర్వణ్యనుకలితచిన్మాత్ర గహనాం
స్వసంవిత్తిం యోగీ రసయతి శివాఖ్యాం భగవతీమ్ || ౧౮ ||
పరానందాకారాం నిరవధిశివైశ్వర్యవపుషం
నిరాకారాం జ్ఞానప్రకృతిమపరిచ్ఛిన్నకరుణామ్ |
సవిత్రీం లోకానాం నిరతిశయధామాస్పదపదాం
భవో వా మోక్షో వా భవతు భవతీమేవ భజతామ్ || ౧౯ ||
జగత్కాయే కృత్వా తదపి హృదయే తచ్చ పురుషే
పుమాంసం బిందుస్థం తదపి వియదాఖ్యే చ గహనే |
తదేతద్జ్ఞానాఖ్యే తదపి పరమానందగహనే
మహావ్యోమాకారే త్వదనుభవశీలో విజయతే || ౨౦ ||
విధే వేద్యే విద్యే వివిధసమయే వేదగులికే
విచిత్రే విశ్వాద్యే వినయసులభే వేదజనని |
శివజ్ఞే శూలస్థే శివపదవదాన్యే శివనిధే
శివే మాతర్మహ్యం త్వయి వితర భక్తిం నిరుపమామ్ || ౨౧ ||
విధేర్ముండం హృత్వా యదకురుత పాత్రం కరతలే
హరిం శూలప్రోతం యదగమయదంసాభరణతామ్ |
అలంచక్రే కంఠం యదపి గరలేనాంబ గిరిశః
శివస్థాయాః శక్తేస్తదిదమఖిలం తే విలసితమ్ || ౨౨ ||
విరించ్యాఖ్యా మాతః సృజసి హరిసంజ్ఞా త్వమవసి
త్రిలోకీం రుద్రాఖ్యా హరసి విదధాసీశ్వరదశామ్ |
భవంతీ నాదాఖ్యా విహరసి చ పాశౌఘదలనీ
త్వమేవైకాఽనేకా భవసి కృతిభేదైర్గిరిసుతే || ౨౩ ||
మునీనాం చేతోభిః ప్రమృదితకషాయైరపి మనా-
-గశక్యం సంస్ప్రష్టుం చకితచకితైరంబ సతతమ్ |
శ్రుతీనాం మూర్ధానః ప్రకృతికఠినాః కోమలతరే
కథం తే విందంతే పదకిసలయే పార్వతి పదమ్ || ౨౪ ||
తటిద్వల్లీం నిత్యామమృతసరితం పారరహితాం
మలోత్తీర్ణాం జ్యోత్స్నాం ప్రకృతిమగుణగ్రంథిగహనామ్ |
గిరాం దూరాం విద్యామవినతకుచాం విశ్వజననీ-
-మపర్యంతాం లక్ష్మీమభిదధతి సంతో భగవతీమ్ || ౨౫ ||
శరీరం క్షిత్యంభః ప్రభృతిరచితం కేవలమచిత్
సుఖం దుఃఖం చాయం కలయతి పుమాంశ్చేతన ఇతి |
స్ఫుటం జానానోఽపి ప్రభవతి న దేహీ రహయితుం
శరీరాహంకారం తవ సమయబాహ్యో గిరిసుతే || ౨౬ ||
పితా మాతా భ్రాతా సుహృదనుచరః సద్మ గృహిణీ
వపుః క్షేత్రం మిత్రం ధనమపి యదా మాం విజహతి |
తదా మే భిందానా సపది భయమోహాంధతమసం
మహాజ్యోత్స్నే మాతర్భవ కరుణయా సన్నిధికరీ || ౨౭ ||
సుతా దక్షస్యాదౌ కిల సకలమాతస్త్వముదభూః
సదోషం తం హిత్వా తదను గిరిరాజస్య దుహితా |
అనాద్యంతా శంభోరపృథగపి శక్తిర్భగవతీ
వివాహాజ్జాయాసీత్యహహ చరితం వేత్తి తవ కః || ౨౮ ||
కణాస్త్వద్దీప్తీనాం రవిశశికృశానుప్రభృతయః
పరం బ్రహ్మ క్షుద్రం తవ నియతమానందకణికా |
శివాది క్షిత్యంతం త్రివలయతనోః సర్వముదరే
తవాస్తే భక్తస్య స్ఫురసి హృది చిత్రం భగవతి || ౨౯ ||
పురః పశ్చాదంతర్బహిరపరిమేయం పరిమితం
పరం స్థూలం సూక్ష్మం సకలమకులం గుహ్యమగుహమ్ |
దవీయో నేదీయః సదసదితి విశ్వం భగవతీ
సదా పశ్యంత్యాఖ్యాం వహసి భువనక్షోభజననీమ్ || ౩౦ ||
ప్రవిశ్య త్వన్మార్గం సహజదయయా దేశికదృశా
షడధ్వధ్వాంతౌఘచ్ఛిదురగణనాతీతకరుణామ్ |
పరామాజ్ఞాకారాం సపది శివయంతీం శివతనుం
స్వమాత్మానం ధన్యాశ్చిరముపలభంతే భగవతీమ్ || ౩౧ ||
మయూఖాః పూష్ణీవ జ్వలన ఇవ తద్దీప్తికణికాః
పయోధౌ కల్లోలాః ప్రతిహతమహిమ్నీవ పృషతః |
ఉదేత్యోదేత్యాంబ త్వయి సహ నిజైః సాత్త్వికగుణై-
-ర్భజంతే తత్త్వౌఘాః ప్రశమమనుకల్పం పరవశాః || ౩౨ ||
విధుర్విష్ణుర్బ్రహ్మా ప్రకృతిరణురాత్మా దినకరః
స్వభావో జైనేంద్రః సుగతమునిరాకాశమలినః |
శివః శక్తిశ్చేతి శ్రుతివిషయతాం తాముపగతాం
వికల్పైరేభిస్త్వామభిదధతి సంతో భగవతీమ్ || ౩౩ ||
శివస్త్వం శక్తిస్త్వం త్వమసి సమయా త్వం సమయినీ
త్వమాత్మా త్వం దీక్షా త్వమయమణిమాదిర్గుణగణః |
అవిద్యా త్వం విద్యా త్వమసి నిఖిలం త్వం కిమపరం
పృథక్తత్త్వం త్వత్తో భగవతి న వీక్షామహ ఇమే || ౩౪ ||
త్వయాసౌ జానీతే రచయతి భవత్యైవ సతతం
త్వయైవేచ్ఛత్యంబ త్వమసి నిఖిలా యస్య తనవః |
జగత్సామ్యం శంభోర్వహసి పరమవ్యోమవపుషః
తథాప్యర్ధం భూత్వా విహరసి శివస్యేతి కిమిదమ్ || ౩౫ ||
అసంఖ్యైః ప్రాచీనైర్జనని జననైః కర్మవిలయా-
-త్సకృజ్జన్మన్యంతే గురువపుషమాసాద్య గిరిశమ్ |
అవాప్యాజ్ఞాం శైవీం శివతనుమపి త్వాం విదితవా-
-న్నయేయం త్వత్పూజాస్తుతివిరచనేనైవ దివసాన్ || ౩౬ ||
యత్షట్పత్రం కమలముదితం తస్య యా కర్ణికాఖ్యా
యోనిస్తస్యాః ప్రథితముదరే యత్తదోంకారపీఠమ్ |
తస్యాప్యంతః కుచభరనతాం కుండలీతి ప్రసిద్ధాం
శ్యామాకారాం సకలజననీం సంతతం భావయామి || ౩౭ ||
భువి పయసి కృశానౌ మారుతే ఖే శశాంకే
సవితరి యజమానేఽప్యష్టధా శక్తిరేకా |
వహసి కుచభరాభ్యాం యావనమ్రాపి విశ్వం
సకలజనని సా త్వం పాహి మామిత్యవాచ్యమ్ || ౩౮ ||
ఇతి శ్రీకాళిదాస విరచిత పంచస్తవ్యాం పంచమః సకలజననీస్తవః |
Panchastavi 5. Sakalajanani Stava
ajānantō yānti kṣayamavaśamanyōnyakalahai-
-ramī māyāgranthau tava pariluṭhantaḥ samayinaḥ |
jaganmātarjanmajvarabhayatamaḥ kaumudi vayaṁ
namastē kurvāṇāḥ śaraṇamupayāmō bhagavatīm || 1 ||
vacastarkāgamyasvarasaparamānandavibhava-
-prabōdhākārāya dyutitulitanīlōtpalarucē |
śivādyārādhyāya stanabharavinamrāya satataṁ
namastasmai kasmaicana bhavatu mugdhāya mahasē || 2 ||
anādyantābhēdapraṇayarasikāpi praṇayinī
śivasyāsīryattvaṁ pariṇayavidhau dēvi gr̥hiṇī |
savitrī bhūtānāmapi yadudabhūḥ śailatanayā
tadētatsaṁsārapraṇayanamahānāṭakamukham || 3 ||
bruvantyēkē tattvaṁ bhagavati sadanyē vidurasa-
-tparē mātaḥ prāhustava sadasadanyē sukavayaḥ |
parē naitatsarvaṁ samabhidadhatē dēvi sudhiya-
-stadētattvanmāyāvilasitamaśēṣaṁ nanu śivē || 4 ||
luṭhadguñjāhārastanabharanamanmadhyalatikā-
-mudañcaddharmāmbhaḥ kaṇaguṇitavaktrāmbujarucam |
śivaṁ pārthatrāṇapravaṇamr̥gayākāraguṇitaṁ
śivāmanvagyāntīṁ śaraṇamahamanvēmi śabarīm || 5 ||
mithaḥ kēśākēśiprathananidhanāstarkaghaṭanāḥ
bahuśraddhābhaktipraṇativiṣayāḥ śāstravidhayaḥ |
prasīda pratyakṣībhava girisutē dēhi śaraṇaṁ
nirālambaṁ cētaḥ pariluṭhati pāriplavamidam || 6 ||
śunāṁ vā vahnērvā khagapariṣadō vā yadaśanaṁ
kadā kēna kvēti kvacidapi na kaścitkalayati |
amuṣminviśvāsaṁ vijahihi mamāhnāya vapuṣi
prapadyēthāścētaḥ sakalajananīmēva śaraṇam || 7 ||
taṭitkōṭijyōtirdyutidalitaṣaḍgranthigahanaṁ
praviṣṭaṁ svādhāraṁ punarapi sudhāvr̥ṣṭivapuṣā |
kimapyaṣṭāviṁśatkiraṇasakalībhūtamaniśaṁ
bhajē dhāma śyāmaṁ kucabharanataṁ barbarakacam || 8 ||
catuṣpatrāntaḥ ṣaḍdalapuṭabhagāntastrivalaya-
-sphuradvidyudvahnidyumaṇiniyutābhadyutilatē |
ṣaḍaśraṁ bhittvādau daśadalamatha dvādaśadalaṁ
kalāśraṁ ca dvyaśraṁ gatavati namastē girisutē || 9 ||
kulaṁ kēcitprāhurvapurakulamanyē tava budhāḥ
parē tatsambhēdaṁ samabhidadhatē kaulamaparē |
caturṇāmapyēṣāmupari kimapi prāhuraparē
mahāmāyē tattvaṁ tava kathamamī niścinumahē || 10 ||
ṣaḍadhvāraṇyānīṁ pralayaravikōṭipratirucā
rucā bhasmīkr̥tya svapadakamalaprahvaśirasām |
vitanvānaḥ śaivaṁ kimapi vapurindīvararuciḥ
kucābhyāmānamrastava puruṣakārō vijayatē || 11 ||
prakāśānandābhyāmaviditacarīṁ madhyapadavīṁ
praviśyaitaddvandvaṁ raviśaśisamākhyaṁ kabalayan |
prapadyōrdhvaṁ nādaṁ layadahanabhasmīkr̥takulaḥ
prasādāttē jantuḥ śivamakulamamba praviśati || 12 ||
manuṣyāstiryañcō maruta iti lōkatrayamidaṁ
bhavāmbhōdhau magnaṁ triguṇalaharīkōṭiluṭhitam |
kaṭākṣaścēdyatra kvacana tava mātaḥ karuṇayā
śarīrī sadyō:’yaṁ vrajati paramānandatanutām || 13 ||
priyaṅguśyāmāṅgīmaruṇataravāsaṁ kisalayāṁ
samunmīlanmuktāphalavahalanēpathyasubhagām |
stanadvandvasphārastabakanamitāṁ kalpalatikāṁ
sakr̥ddhyāyantastvāṁ dadhati śivacintāmaṇipadam || 14 ||
ṣaḍādhārāvartairaparimitamantrōrmipaṭalaiḥ
lasanmudrāphēnairbahuvidhalasaddaivatajhaṣaiḥ |
kramasrōtōbhistvaṁ vahasi paranādāmr̥tanadī
bhavāni pratyagrā śivacidamr̥tābdhipraṇayinī || 15 ||
mahīpāthōvahniśvasanaviyadātmēnduravibhi-
-rvapurbhigrastāśairapi tava kiyānamba mahimā |
amūnyālōkyantē bhagavati na kutrāpyaṇutamā-
-mavasthāṁ prāptāni tvayi tu paramavyōmavapuṣi || 16 ||
kalāmājñāṁ prajñāṁ samayamanubhūtiṁ samarasaṁ
guruṁ pāramparyaṁ vinayamupadēśaṁ śivapadam |
pramāṇaṁ nirvāṇaṁ prakr̥timabhibhūtiṁ paraguhāṁ
vidhiṁ vidyāmāhuḥ sakalajananīmēva munayaḥ || 17 ||
pralīnē śabdaughē tadanu viratē binduvibhavē
tatastattvē cāṣṭadhvanibhiranapāyinyadhigatē |
śritē śāktē parvaṇyanukalitacinmātra gahanāṁ
svasaṁvittiṁ yōgī rasayati śivākhyāṁ bhagavatīm || 18 ||
parānandākārāṁ niravadhiśivaiśvaryavapuṣaṁ
nirākārāṁ jñānaprakr̥timaparicchinnakaruṇām |
savitrīṁ lōkānāṁ niratiśayadhāmāspadapadāṁ
bhavō vā mōkṣō vā bhavatu bhavatīmēva bhajatām || 19 ||
jagatkāyē kr̥tvā tadapi hr̥dayē tacca puruṣē
pumāṁsaṁ bindusthaṁ tadapi viyadākhyē ca gahanē |
tadētadjñānākhyē tadapi paramānandagahanē
mahāvyōmākārē tvadanubhavaśīlō vijayatē || 20 ||
vidhē vēdyē vidyē vividhasamayē vēdagulikē
vicitrē viśvādyē vinayasulabhē vēdajanani |
śivajñē śūlasthē śivapadavadānyē śivanidhē
śivē mātarmahyaṁ tvayi vitara bhaktiṁ nirupamām || 21 ||
vidhērmuṇḍaṁ hr̥tvā yadakuruta pātraṁ karatalē
hariṁ śūlaprōtaṁ yadagamayadaṁsābharaṇatām |
alañcakrē kaṇṭhaṁ yadapi garalēnāmba giriśaḥ
śivasthāyāḥ śaktēstadidamakhilaṁ tē vilasitam || 22 ||
viriñcyākhyā mātaḥ sr̥jasi harisañjñā tvamavasi
trilōkīṁ rudrākhyā harasi vidadhāsīśvaradaśām |
bhavantī nādākhyā viharasi ca pāśaughadalanī
tvamēvaikā:’nēkā bhavasi kr̥tibhēdairgirisutē || 23 ||
munīnāṁ cētōbhiḥ pramr̥ditakaṣāyairapi manā-
-gaśakyaṁ saṁspraṣṭuṁ cakitacakitairamba satatam |
śrutīnāṁ mūrdhānaḥ prakr̥tikaṭhināḥ kōmalatarē
kathaṁ tē vindantē padakisalayē pārvati padam || 24 ||
taṭidvallīṁ nityāmamr̥tasaritaṁ pārarahitāṁ
malōttīrṇāṁ jyōtsnāṁ prakr̥timaguṇagranthigahanām |
girāṁ dūrāṁ vidyāmavinatakucāṁ viśvajananī-
-maparyantāṁ lakṣmīmabhidadhati santō bhagavatīm || 25 ||
śarīraṁ kṣityambhaḥ prabhr̥tiracitaṁ kēvalamacit
sukhaṁ duḥkhaṁ cāyaṁ kalayati pumāṁścētana iti |
sphuṭaṁ jānānō:’pi prabhavati na dēhī rahayituṁ
śarīrāhaṅkāraṁ tava samayabāhyō girisutē || 26 ||
pitā mātā bhrātā suhr̥danucaraḥ sadma gr̥hiṇī
vapuḥ kṣētraṁ mitraṁ dhanamapi yadā māṁ vijahati |
tadā mē bhindānā sapadi bhayamōhāndhatamasaṁ
mahājyōtsnē mātarbhava karuṇayā sannidhikarī || 27 ||
sutā dakṣasyādau kila sakalamātastvamudabhūḥ
sadōṣaṁ taṁ hitvā tadanu girirājasya duhitā |
anādyantā śambhōrapr̥thagapi śaktirbhagavatī
vivāhājjāyāsītyahaha caritaṁ vētti tava kaḥ || 28 ||
kaṇāstvaddīptīnāṁ raviśaśikr̥śānuprabhr̥tayaḥ
paraṁ brahma kṣudraṁ tava niyatamānandakaṇikā |
śivādi kṣityantaṁ trivalayatanōḥ sarvamudarē
tavāstē bhaktasya sphurasi hr̥di citraṁ bhagavati || 29 ||
puraḥ paścādantarbahiraparimēyaṁ parimitaṁ
paraṁ sthūlaṁ sūkṣmaṁ sakalamakulaṁ guhyamaguham |
davīyō nēdīyaḥ sadasaditi viśvaṁ bhagavatī
sadā paśyantyākhyāṁ vahasi bhuvanakṣōbhajananīm || 30 ||
praviśya tvanmārgaṁ sahajadayayā dēśikadr̥śā
ṣaḍadhvadhvāntaughacchiduragaṇanātītakaruṇām |
parāmājñākārāṁ sapadi śivayantīṁ śivatanuṁ
svamātmānaṁ dhanyāściramupalabhantē bhagavatīm || 31 ||
mayūkhāḥ pūṣṇīva jvalana iva taddīptikaṇikāḥ
payōdhau kallōlāḥ pratihatamahimnīva pr̥ṣataḥ |
udētyōdētyāmba tvayi saha nijaiḥ sāttvikaguṇai-
-rbhajantē tattvaughāḥ praśamamanukalpaṁ paravaśāḥ || 32 ||
vidhurviṣṇurbrahmā prakr̥tiraṇurātmā dinakaraḥ
svabhāvō jainēndraḥ sugatamunirākāśamalinaḥ |
śivaḥ śaktiścēti śrutiviṣayatāṁ tāmupagatāṁ
vikalpairēbhistvāmabhidadhati santō bhagavatīm || 33 ||
śivastvaṁ śaktistvaṁ tvamasi samayā tvaṁ samayinī
tvamātmā tvaṁ dīkṣā tvamayamaṇimādirguṇagaṇaḥ |
avidyā tvaṁ vidyā tvamasi nikhilaṁ tvaṁ kimaparaṁ
pr̥thaktattvaṁ tvattō bhagavati na vīkṣāmaha imē || 34 ||
tvayāsau jānītē racayati bhavatyaiva satataṁ
tvayaivēcchatyamba tvamasi nikhilā yasya tanavaḥ |
jagatsāmyaṁ śambhōrvahasi paramavyōmavapuṣaḥ
tathāpyardhaṁ bhūtvā viharasi śivasyēti kimidam || 35 ||
asaṅkhyaiḥ prācīnairjanani jananaiḥ karmavilayā-
-tsakr̥jjanmanyantē guruvapuṣamāsādya giriśam |
avāpyājñāṁ śaivīṁ śivatanumapi tvāṁ viditavā-
-nnayēyaṁ tvatpūjāstutiviracanēnaiva divasān || 36 ||
yatṣaṭpatraṁ kamalamuditaṁ tasya yā karṇikākhyā
yōnistasyāḥ prathitamudarē yattadōṅkārapīṭham |
tasyāpyantaḥ kucabharanatāṁ kuṇḍalīti prasiddhāṁ
śyāmākārāṁ sakalajananīṁ santataṁ bhāvayāmi || 37 ||
bhuvi payasi kr̥śānau mārutē khē śaśāṅkē
savitari yajamānē:’pyaṣṭadhā śaktirēkā |
vahasi kucabharābhyāṁ yāvanamrāpi viśvaṁ
sakalajanani sā tvaṁ pāhi māmityavācyam || 38 ||
iti śrīkālidāsa viracita pañcastavyāṁ pañcamaḥ sakalajananīstavaḥ |
