శ్రీ మంగళగౌరీ స్తోత్రం
దేవి త్వదీయచరణాంబుజరేణు గౌరీం
భాలస్థలీం వహతి యః ప్రణతిప్రవీణః |
జన్మాంతరేఽపి రజనీకరచారులేఖా
తాం గౌరయత్యతితరాం కిల తస్య పుంసః || ౧ ||
శ్రీమంగళే సకలమంగళజన్మభూమే
శ్రీమంగళే సకలకల్మషతూలవహ్నే |
శ్రీమంగళే సకలదానవదర్పహంత్రి
శ్రీమంగళేఽఖిలమిదం పరిపాహి విశ్వమ్ || ౨ ||
విశ్వేశ్వరి త్వమసి విశ్వజనస్య కర్త్రీ
త్వం పాలయిత్ర్యసి తథా ప్రళయేఽపి హంత్రీ |
త్వన్నామకీర్తనసముల్లసదచ్ఛపుణ్యా
స్రోతస్వినీ హరతి పాతకకూలవృక్షాన్ || ౩ ||
మాతర్భవాని భవతీ భవతీవ్రదుఃఖ-
-సంభారహారిణి శరణ్యమిహాస్తి నాన్యా |
ధన్యాస్త ఏవ భువనేషు త ఏవ మాన్యా
యేషు స్ఫురేత్తవశుభః కరుణాకటాక్షః || ౪ ||
యే త్వా స్మరంతి సతతం సహజప్రకాశాం
కాశీపురీస్థితిమతీం నతమోక్షలక్ష్మీమ్ |
తాం సంస్మరేత్స్మరహరో ధృతశుద్ధబుద్ధీ-
-న్నిర్వాణరక్షణవిచక్షణపాత్రభూతాన్ || ౫ ||
మాతస్తవాంఘ్రియుగళం విమలం హృదిస్థం
యస్యాస్తి తస్య భువనం సకలం కరస్థమ్ |
యో నామతేజ ఏతి మంగళగౌరి నిత్యం
సిద్ధ్యష్టకం న పరిముంచతి తస్య గేహమ్ || ౬ ||
త్వం దేవి వేదజననీ ప్రణవస్వరూపా
గాయత్ర్యసి త్వమసి వై ద్విజకామధేనుః |
త్వం వ్యాహృతిత్రయమిహాఽఖిలకర్మసిద్ధ్యై
స్వాహాస్వధాసి సుమనః పితృతృప్తిహేతుః || ౭ ||
గౌరి త్వమేవ శశిమౌళిని వేధసి త్వం
సావిత్ర్యసి త్వమసి చక్రిణి చారులక్ష్మీః |
కాశ్యాం త్వమస్యమలరూపిణి మోక్షలక్ష్మీః
త్వం మే శరణ్యమిహ మంగళగౌరి మాతః || ౮ ||
స్తుత్వేతి తాం స్మరహరార్ధశరీరశోభాం
శ్రీమంగళాష్టక మహాస్తవనేన భానుః |
దేవీం చ దేవమసకృత్పరితః ప్రణమ్య
తూష్ణీం బభూవ సవితా శివయోః పురస్తాత్ || ౯ ||
ఇతి శ్రీస్కాందపురాణే కాశీఖండే రవికృత శ్రీమంగళగౌరీ స్తోత్రమ్ |
Sri Mangala Gauri Stotram
dēvi tvadīyacaraṇāmbujarēṇu gaurīṁ
bhālasthalīṁ vahati yaḥ praṇatipravīṇaḥ |
janmāntarē:’pi rajanīkaracārulēkhā
tāṁ gaurayatyatitarāṁ kila tasya puṁsaḥ || 1 ||
śrīmaṅgalē sakalamaṅgalajanmabhūmē
śrīmaṅgalē sakalakalmaṣatūlavahnē |
śrīmaṅgalē sakaladānavadarpahantri
śrīmaṅgalē:’khilamidaṁ paripāhi viśvam || 2 ||
viśvēśvari tvamasi viśvajanasya kartrī
tvaṁ pālayitryasi tathā pralayē:’pi hantrī |
tvannāmakīrtanasamullasadacchapuṇyā
srōtasvinī harati pātakakūlavr̥kṣān || 3 ||
mātarbhavāni bhavatī bhavatīvraduḥkha-
-sambhārahāriṇi śaraṇyamihāsti nānyā |
dhanyāsta ēva bhuvanēṣu ta ēva mānyā
yēṣu sphurēttavaśubhaḥ karuṇākaṭākṣaḥ || 4 ||
yē tvā smaranti satataṁ sahajaprakāśāṁ
kāśīpurīsthitimatīṁ natamōkṣalakṣmīm |
tāṁ saṁsmarētsmaraharō dhr̥taśuddhabuddhī-
-nnirvāṇarakṣaṇavicakṣaṇapātrabhūtān || 5 ||
mātastavāṅghriyugalaṁ vimalaṁ hr̥disthaṁ
yasyāsti tasya bhuvanaṁ sakalaṁ karastham |
yō nāmatēja ēti maṅgalagauri nityaṁ
siddhyaṣṭakaṁ na parimuñcati tasya gēham || 6 ||
tvaṁ dēvi vēdajananī praṇavasvarūpā
gāyatryasi tvamasi vai dvijakāmadhēnuḥ |
tvaṁ vyāhr̥titrayamihā:’khilakarmasiddhyai
svāhāsvadhāsi sumanaḥ pitr̥tr̥ptihētuḥ || 7 ||
gauri tvamēva śaśimaulini vēdhasi tvaṁ
sāvitryasi tvamasi cakriṇi cārulakṣmīḥ |
kāśyāṁ tvamasyamalarūpiṇi mōkṣalakṣmīḥ
tvaṁ mē śaraṇyamiha maṅgalagauri mātaḥ || 8 ||
stutvēti tāṁ smaraharārdhaśarīraśōbhāṁ
śrīmaṅgalāṣṭaka mahāstavanēna bhānuḥ |
dēvīṁ ca dēvamasakr̥tparitaḥ praṇamya
tūṣṇīṁ babhūva savitā śivayōḥ purastāt || 9 ||
iti śrīskāndapurāṇē kāśīkhaṇḍē ravikr̥ta śrīmaṅgalagaurī stōtram |
