శ్రీ దాక్షాయణీ స్తోత్రం
గంభీరావర్తనాభీ మృగమదతిలకా వామబింబాధరోష్టీ
శ్రీకాంతాకాంచిదామ్నా పరివృత జఘనా కోకిలాలాపవాణి |
కౌమారీ కంబుకంఠీ ప్రహసితవదనా ధూర్జటీప్రాణకాంతా
రంభోరూ సింహమధ్యా హిమగిరితనయా శాంభవీ నః పునాతు || ౧ ||
దద్యాత్కల్మషహారిణీ శివతనూ పాశాంకుశాలంకృతా
శర్వాణీ శశిసూర్యవహ్నినయనా కుందాగ్రదంతోజ్జ్వలా |
కారుణ్యామృతపూర్ణవాగ్విలసితా మత్తేభకుంభస్తనీ
లోలాక్షీ భవబంధమోక్షణకరీ స్వ శ్రేయసం సంతతమ్ || ౨ ||
మధ్యే సుధాబ్ధి మణిమంటపరత్న వేద్యాం
సింహాసనోపరిగతాం పరిపీతవర్ణామ్ |
పీతాంబరాభరణమాల్యవిచిత్రగాత్రీం
దేవీం భజామి నితరాం నుతవేదజిహ్వామ్ || ౩ ||
సన్నద్ధాం వివిధాయుధైః పరివృతాం ప్రాంతే కుమారీగణై-
ర్ధ్యాయేదీప్సితదాయినీం త్రిణయనాం సింహాధిరూఢాంసితాం |
శంఖారీషుధనూంషి చారు దధతీం చిత్రాయుధాం తర్జనీం
వామే శక్తిమణీం మహాఘమితరే శ్రీ శక్తికాం శూలినీమ్ || ౪ ||
కింశుకీదళవిశాలలోచనాం కించనాగరసవల్లిసంయుతాం |
అంగచంపకసమానవర్ణినీం శంకరప్రియసతీం నమామ్యహమ్ || ౫ ||
ఆరుహ్య సింహమసిచర్మరథాంగశంఖ
శక్తి త్రిశూలశరచాపధరాం పురస్తాత్ |
గచ్ఛత్వమంబ దురితాపద దుష్టకృత్యా-
త్సంరక్షణాయ సతతం మమ దేవి దుర్గే || ౬ ||
దినకరశశినేత్రీ దివ్యరుద్రార్ధగాత్రీ
ఘనసముచితధాత్రీ కల్పవల్లీ సవిత్రీ |
అనవరతపవిత్రీ చాంబికా కాళరాత్రీ
మునివినుతచరిత్రీ మోహినీ శైలపుత్రీ || ౭ ||
జలరుహసమపాణీ సత్కళాబాణతూణీ
సులలితముఖవీణా సర్వవిద్యాప్రవీణా |
అలఘుహతపురాణా హ్యర్థభాషాధురీణా
అళి సముదయవేణీ శైలజా పాతు వాణీ || ౮ ||
వివిధగుణకరాళీ విశ్వతత్త్వావరాళీ
శివహృదయసమేళీ స్వైరకృన్మన్మథాళీ |
నవమణిమయమౌళీ నాగరక్షోవిభాళీ
ధవళభసితధూళీధారిణీ భద్రకాళీ || ౯ ||
జననమరణహారీ సర్వలోకోపకారీ
జవజనితవిహారీ చారువక్షోజహారీ |
కనకగిరివిహారీ కాళగర్వోపహారీ
ఘనఫణిధరహారీ కాళికా పాతు గౌరీ || ౧౦ ||
మలహరణమతంగీ మంత్రయంత్రప్రసంగీ
వలయిత సుభుజాంగీ వాఙ్మయీ మానసాంగీ |
విలయభయవిహంగీ విశ్వతోరక్ష్యపాంగీ
కలితజయతురంగీ ఖండచంద్రోత్తమాంగీ || ౧౧ ||
అంబ త్వదంఘ్ర్యంబుజతత్పరాణాం
ముఖారవిందే సరసం కవిత్వం |
కరారవిందే వరకల్పవల్లీ
పదారవిందే నృపమౌళిరాజః || ౧౨ ||
పురవైరిపత్ని మురవైరిపూజితే
జలదాళివేణి ఫలదాయకే శివే |
సదయం ససంపదుదయం కురుష్వ మాం
జగదంబ శాంభవి కదంబవాసిని || ౧౩ ||
విజయవిభవధాత్రీ విశ్వకల్యాణగాత్రీ
మధుకరశుభవేణీ మంగళావాసవాణీ |
శతముఖవిధిగీతా శాంభవీ లోకమాతా
కరిరసముఖపార్శ్వా కామకోటీ సదావ్యాత్ || ౧౪ ||
మధుపమహితమౌర్వీ మల్లికామంజుళోర్వీ
ధరపతివరకన్యా ధీరభూతేషు ధన్యా |
మణిమయఘనవీణామంజరీదివ్యబాణా
కరిరిపుజయఘోటీ కామకోటీసహాయీ || ౧౫ ||
అంబ త్వదంశోరణురంశుమాలీ
తవైవ మందస్మితబిందురిందుః |
త్వయా దృతం సల్లపితం త్రయీ స్యాత్
పుంభావలీలా పురుషత్రయీ హి || ౧౬ ||
దుర్వేదనానుభవపావకధూయమానా
నిర్వేదమేతి నితరాం కలనా మదీయా |
పర్వేందుసుందరముఖి ప్రణతానుకంపే
సర్వేశ్వరి త్రిపురసుందరి మే ప్రసీద || ౧౭ ||
యత్ప్రభాపటలపాటలం జగ-
త్పద్మరాగమణిమంటపాయతే |
పాశపాణిసృణిపాణిభావయే
చాపపాణి శరపాణి దైవతమ్ || ౧౮ ||
ఐశ్వర్యమష్టవిధమష్టదిగీశ్వరత్వ-
మష్టాత్మతా చ ఫలమాశ్రయిణామతీవ |
ముద్రాం వహన్ ఘనధియా వటమూలవాసీ
మోదం తనోతు మమ ముగ్ధశశాంకచూడః || ౧౯ ||
గేహం నాకతి గర్వితం ప్రణమతి స్త్రీసంగమో మోక్షతి
ద్వేషీ మిత్రతి పాతకం సుకృతతి క్ష్మావల్లభో దాసతి |
మృత్యుర్వైద్యతి దూషణం సుగుణతి త్వత్పాదసంసేవనా-
త్త్వాం వందే భవభీతిభంజనకరీం గౌరీం గిరీశప్రియే || ౨౦ ||
పాతయ వా పాతాళే స్నాపయ వా సకలలోకసామ్రాజ్యే |
మాతస్తవ పదయుగళం నాహం ముంచామి నైవ ముంచామి || ౨౧ ||
ఆపది కిం కరణీయం స్మరణీయం చరణయుగళమంబాయాః |
తత్స్మరణం కిం కురుతే బ్రహ్మాదీనపి చ కింకరీ కురుతే || ౨౨ ||
మాతర్మే మధుకైటభఘ్ని మహిషప్రాణాపహారోద్యమే
హేలానిర్మితధూమ్రలోచనవధే హే చండముండార్దినీ |
నిశ్శేషీకృతరక్తబీజదనుజే నిత్యే నిశుంభాపహే
శుంభధ్వంసిని సంహరాశు దురితం దుర్గే నమస్తేంబికే || ౨౩ ||
రక్తాభామరుణాంశుకాంబరధరా-మానందపూర్ణాననాం
ముక్తాహారవిభూషితాం కుచభరక్లాంతాం సకాంచీగుణాం |
దేవీం దివ్యరసాన్నపాత్రకరణా-మంభోజదర్వీకరాం
ధ్యాయేశంకరవల్లభాం త్రిణయనామంబాం సదాన్నప్రదామ్ || ౨౪ ||
ఉద్యద్భానునిభాం దుకూలవసనాం క్షీరోదమధ్యే శుభే
మూలే కల్పతరోః స్ఫురన్మణిమయే సింహాసనే సుస్థితామ్ |
బిభ్రాణాం స్వశయే సువర్ణచషకం బీజం చ శాల్యోద్భవం
భక్తాభీష్టవరాభయాంజలిపుటాం ధ్యాయేన్నపూర్ణేశ్వరీమ్ || ౨౫ ||
వామే పాయసపూర్ణ హేమకలశం పాణౌ వహంతీ ముదా
చాన్యే పాణితలే సువర్ణరచితాం దర్వీం చ భూషోజ్వలామ్ |
అంబా శుద్ధదుకూలచిత్రవసనా కారుణ్యపూర్ణేక్షణా
శ్యామా కాచన శంకర ప్రియతమా శాతోదరీ దృశ్యతే || ౨౬ ||
కరేణుచంచన్మణికంకణేన దర్వీం దధానాం ధవళాన్నపూర్ణే |
సదావలోకే కరుణాలవాలాం కాశీపురీకల్పలతాం భవానీమ్ || ౨౭ ||
యా మాణిక్యమనోజ్ఞహారవిధినా సింధూరభాసాన్వితా
తారానాయక శేఖరా త్రిణయనా పీన స్తనోద్భాసితా |
బంధూకప్రసవారుణాంబరధరా మార్తాండకోట్యుజ్జ్వలా
సా దద్యాద్భువనేశ్వరీ భగవతీ శ్రేయాంసి భూయాంసి నః || ౨౮ ||
మాణిక్యనూపురవిభూషితపాదపద్మాం
హస్తారవిందకరుణారసపూర్ణదర్వీం |
సంధ్యారుణాంశుకధరాం నవచంద్రచూడాం
మందస్మితే గిరిసుతే భవతీం భజామి || ౨౯ ||
స్మరేత్ప్రథమపుష్పిణీం రుధిరపుష్టనీలాంబరాం
గృహీతమధుపాత్రికాం మదవిఘూర్ణ నేత్రాంచలాం |
కరస్ఫురితవల్లకీం కలితకంబుతాటంకినీం
ఘనస్తనభరోల్లసద్గళితచూళికాం శ్యామలామ్ || ౩౦ ||
దాక్షాయణ్యవతారాణాం రక్షాస్తోత్రం పఠేన్నరః |
సాక్షాద్దేవీపదం యాతి రక్షామాప్నోతి భూతలే || ౩౧ ||
ఇతి శ్రీ దాక్షాయణీ స్తోత్రమ్ |
Sri Dakshayani Stotram
gambhīrāvartanābhī mr̥gamadatilakā vāmabimbādharōṣṭī
śrīkāntākāñcidāmnā parivr̥ta jaghanā kōkilālāpavāṇi |
kaumārī kambukaṇṭhī prahasitavadanā dhūrjaṭīprāṇakāntā
rambhōrū siṁhamadhyā himagiritanayā śāmbhavī naḥ punātu || 1 ||
dadyātkalmaṣahāriṇī śivatanū pāśāṅkuśālaṅkr̥tā
śarvāṇī śaśisūryavahninayanā kundāgradantōjjvalā |
kāruṇyāmr̥tapūrṇavāgvilasitā mattēbhakumbhastanī
lōlākṣī bhavabandhamōkṣaṇakarī sva śrēyasaṁ santatam || 2 ||
madhyē sudhābdhi maṇimaṇṭaparatna vēdyāṁ
siṁhāsanōparigatāṁ paripītavarṇām |
pītāmbarābharaṇamālyavicitragātrīṁ
dēvīṁ bhajāmi nitarāṁ nutavēdajihvām || 3 ||
sannaddhāṁ vividhāyudhaiḥ parivr̥tāṁ prāntē kumārīgaṇai-
rdhyāyēdīpsitadāyinīṁ triṇayanāṁ siṁhādhirūḍhāṁsitāṁ |
śaṅkhārīṣudhanūmṣi cāru dadhatīṁ citrāyudhāṁ tarjanīṁ
vāmē śaktimaṇīṁ mahāghamitarē śrī śaktikāṁ śūlinīm || 4 ||
kimśukīdalaviśālalōcanāṁ kiñcanāgarasavallisamyutāṁ |
aṅgacampakasamānavarṇinīṁ śaṅkarapriyasatīṁ namāmyaham || 5 ||
āruhya siṁhamasicarmarathāṅgaśaṅkha
śakti triśūlaśaracāpadharāṁ purastāt |
gacchatvamamba duritāpada duṣṭakr̥tyā-
tsaṁrakṣaṇāya satataṁ mama dēvi durgē || 6 ||
dinakaraśaśinētrī divyarudrārdhagātrī
ghanasamucitadhātrī kalpavallī savitrī |
anavaratapavitrī cāmbikā kālarātrī
munivinutacaritrī mōhinī śailaputrī || 7 ||
jalaruhasamapāṇī satkalābāṇatūṇī
sulalitamukhavīṇā sarvavidyāpravīṇā |
alaghuhatapurāṇā hyarthabhāṣādhurīṇā
ali samudayavēṇī śailajā pātu vāṇī || 8 ||
vividhaguṇakarālī viśvatattvāvarālī
śivahr̥dayasamēlī svairakr̥nmanmathālī |
navamaṇimayamaulī nāgarakṣōvibhālī
dhavalabhasitadhūlīdhāriṇī bhadrakālī || 9 ||
jananamaraṇahārī sarvalōkōpakārī
javajanitavihārī cāruvakṣōjahārī |
kanakagirivihārī kālagarvōpahārī
ghanaphaṇidharahārī kālikā pātu gaurī || 10 ||
malaharaṇamataṅgī mantrayantraprasaṅgī
valayita subhujāṅgī vāṅmayī mānasāṅgī |
vilayabhayavihaṅgī viśvatōrakṣyapāṅgī
kalitajayaturaṅgī khaṇḍacandrōttamāṅgī || 11 ||
amba tvadaṅghryambujatatparāṇāṁ
mukhāravindē sarasaṁ kavitvaṁ |
karāravindē varakalpavallī
padāravindē nr̥pamaulirājaḥ || 12 ||
puravairipatni muravairipūjitē
jaladālivēṇi phaladāyakē śivē |
sadayaṁ sasampadudayaṁ kuruṣva māṁ
jagadamba śāmbhavi kadambavāsini || 13 ||
vijayavibhavadhātrī viśvakalyāṇagātrī
madhukaraśubhavēṇī maṅgalāvāsavāṇī |
śatamukhavidhigītā śāmbhavī lōkamātā
karirasamukhapārśvā kāmakōṭī sadāvyāt || 14 ||
madhupamahitamaurvī mallikāmañjulōrvī
dharapativarakanyā dhīrabhūtēṣu dhanyā |
maṇimayaghanavīṇāmañjarīdivyabāṇā
kariripujayaghōṭī kāmakōṭīsahāyī || 15 ||
amba tvadamśōraṇuramśumālī
tavaiva mandasmitabindurinduḥ |
tvayā dr̥taṁ sallapitaṁ trayī syāt
pumbhāvalīlā puruṣatrayī hi || 16 ||
durvēdanānubhavapāvakadhūyamānā
nirvēdamēti nitarāṁ kalanā madīyā |
parvēndusundaramukhi praṇatānukampē
sarvēśvari tripurasundari mē prasīda || 17 ||
yatprabhāpaṭalapāṭalaṁ jaga-
tpadmarāgamaṇimaṇṭapāyatē |
pāśapāṇisr̥ṇipāṇibhāvayē
cāpapāṇi śarapāṇi daivatam || 18 ||
aiśvaryamaṣṭavidhamaṣṭadigīśvaratva-
maṣṭātmatā ca phalamāśrayiṇāmatīva |
mudrāṁ vahan ghanadhiyā vaṭamūlavāsī
mōdaṁ tanōtu mama mugdhaśaśāṅkacūḍaḥ || 19 ||
gēhaṁ nākati garvitaṁ praṇamati strīsaṅgamō mōkṣati
dvēṣī mitrati pātakaṁ sukr̥tati kṣmāvallabhō dāsati |
mr̥tyurvaidyati dūṣaṇaṁ suguṇati tvatpādasaṁsēvanā-
ttvāṁ vandē bhavabhītibhañjanakarīṁ gaurīṁ girīśapriyē || 20 ||
pātaya vā pātālē snāpaya vā sakalalōkasāmrājyē |
mātastava padayugalaṁ nāhaṁ muñcāmi naiva muñcāmi || 21 ||
āpadi kiṁ karaṇīyaṁ smaraṇīyaṁ caraṇayugalamambāyāḥ |
tatsmaraṇaṁ kiṁ kurutē brahmādīnapi ca kiṅkarī kurutē || 22 ||
mātarmē madhukaiṭabhaghni mahiṣaprāṇāpahārōdyamē
hēlānirmitadhūmralōcanavadhē hē caṇḍamuṇḍārdinī |
niśśēṣīkr̥taraktabījadanujē nityē niśumbhāpahē
śumbhadhvaṁsini saṁharāśu duritaṁ durgē namastēmbikē || 23 ||
raktābhāmaruṇāmśukāmbaradharā-mānandapūrṇānanāṁ
muktāhāravibhūṣitāṁ kucabharaklāntāṁ sakāñcīguṇāṁ |
dēvīṁ divyarasānnapātrakaraṇā-mambhōjadarvīkarāṁ
dhyāyēśaṅkaravallabhāṁ triṇayanāmambāṁ sadānnapradām || 24 ||
udyadbhānunibhāṁ dukūlavasanāṁ kṣīrōdamadhyē śubhē
mūlē kalpatarōḥ sphuranmaṇimayē siṁhāsanē susthitām |
bibhrāṇāṁ svaśayē suvarṇacaṣakaṁ bījaṁ ca śālyōdbhavaṁ
bhaktābhīṣṭavarābhayāñjalipuṭāṁ dhyāyēnnapūrṇēśvarīm || 25 ||
vāmē pāyasapūrṇa hēmakalaśaṁ pāṇau vahantī mudā
cānyē pāṇitalē suvarṇaracitāṁ darvīṁ ca bhūṣōjvalām |
ambā śuddhadukūlacitravasanā kāruṇyapūrṇēkṣaṇā
śyāmā kācana śaṅkara priyatamā śātōdarī dr̥śyatē || 26 ||
karēṇucañcanmaṇikaṅkaṇēna darvīṁ dadhānāṁ dhavalānnapūrṇē |
sadāvalōkē karuṇālavālāṁ kāśīpurīkalpalatāṁ bhavānīm || 27 ||
yā māṇikyamanōjñahāravidhinā sindhūrabhāsānvitā
tārānāyaka śēkharā triṇayanā pīna stanōdbhāsitā |
bandhūkaprasavāruṇāmbaradharā mārtāṇḍakōṭyujjvalā
sā dadyādbhuvanēśvarī bhagavatī śrēyāṁsi bhūyāṁsi naḥ || 28 ||
māṇikyanūpuravibhūṣitapādapadmāṁ
hastāravindakaruṇārasapūrṇadarvīṁ |
sandhyāruṇāmśukadharāṁ navacandracūḍāṁ
mandasmitē girisutē bhavatīṁ bhajāmi || 29 ||
smarētprathamapuṣpiṇīṁ rudhirapuṣṭanīlāmbarāṁ
gr̥hītamadhupātrikāṁ madavighūrṇa nētrāñcalāṁ |
karasphuritavallakīṁ kalitakambutāṭaṅkinīṁ
ghanastanabharōllasadgalitacūlikāṁ śyāmalām || 30 ||
dākṣāyaṇyavatārāṇāṁ rakṣāstōtraṁ paṭhēnnaraḥ |
sākṣāddēvīpadaṁ yāti rakṣāmāpnōti bhūtalē || 31 ||
iti śrī dākṣāyaṇī stōtram |
