శ్రీ గౌరీ సప్తశ్లోకీ స్తుతిః
కరోపాంతే కాంతే వితరణరవంతే విదధతీం
నవాం వీణాం శోణామభిరుచిభరేణాంకవదనాం |
సదా వందే మందేతరమతిరహం దేశికవశా-
త్కృపాలంబామంబాం కుసుమితకదంబాంకణగృహామ్ || ౧ ||
శశిప్రఖ్యం ముఖ్యం కృతకమలసఖ్యం తవ ముఖం
సుధావాసం హాసం స్మితరుచిభిరాసన్న కుముదం |
కృపాపాత్రే నేత్రే దురితకరితోత్రేచ నమతాం
సదా లోకే లోకేశ్వరి విగతశోకేన మనసా || ౨ ||
అపి వ్యాధా వాధావపి సతి సమాధాయ హృది తా
మనౌపమ్యాం రమ్యాం మునిభిరవగమ్యాం తవ కలాం,
నిజామాద్యాం విద్యాం నియతమనవద్యాం న కలయే
న మాతంగీమంగీకృతసరససంగీతరసికామ్ || ౩ ||
స్ఫురద్రూపానీపావనిరుహసమీపాశ్రయపరా
సుధాధారాధారాధరరుచిరుదారా కరుణయా |
స్తుతి ప్రీతా గీతామునిభిరుపనీతా తవ కలా
త్రయీసీమా సా మామవతు సురసామాజికమతా || ౪ ||
తులాకోటీకోటీ కిరణపరిపాటి దినకరం
నఖచ్ఛాయామాయా శశినళినదాయాదవిభవం |
పదం సేవే భావే తవ విపదభావే విలసితం
జగన్మాతః ప్రాతః కమలముఖి నాతః పరతరమ్ || ౫ ||
కనత్ఫాలాం బాలాం లళితశుకలీలాంబుజకరాం
లసద్ధారాధారాం కచవిజితధారాధరరుచిం |
రమేంద్రాణీవాణీ లసదసితవేణీసుమపదాం
మహత్సీమాం శ్యామామరుణగిరివామాం భజ మతే || ౬ ||
గజారణ్యే పుణ్యే శ్రితజనశరణ్యే భగవతీ
జపావర్ణాపర్ణాం తరళతరకర్ణాంతనయనా |
అనాద్యంతా శాంతాబుధజనసుసంతానలతికా
జగన్మాతా పూతా తుహినగిరిజాతా విజయతే || ౭ ||
గౌర్యాస్సప్తస్తుతిం నిత్యం ప్రభాతే నియతః పఠేత్ |
తస్యసర్వాణి సిద్ధ్యన్తి వాంఛితాని న సంశయః || ౮ ||
Sri Gauri Saptashloki stuti
karōpāntē kāntē vitaraṇaravantē vidadhatīṁ
navāṁ vīṇāṁ śōṇāmabhirucibharēṇāṅkavadanāṁ |
sadā vandē mandētaramatirahaṁ dēśikavaśā-
tkr̥pālambāmambāṁ kusumitakadambāṅkaṇagr̥hām || 1 ||
śaśiprakhyaṁ mukhyaṁ kr̥takamalasakhyaṁ tava mukhaṁ
sudhāvāsaṁ hāsaṁ smitarucibhirāsanna kumudaṁ |
kr̥pāpātrē nētrē duritakaritōtrēca namatāṁ
sadā lōkē lōkēśvari vigataśōkēna manasā || 2 ||
api vyādhā vādhāvapi sati samādhāya hr̥di tā
manaupamyāṁ ramyāṁ munibhiravagamyāṁ tava kalāṁ,
nijāmādyāṁ vidyāṁ niyatamanavadyāṁ na kalayē
na mātaṅgīmaṅgīkr̥tasarasasaṅgītarasikām || 3 ||
sphuradrūpānīpāvaniruhasamīpāśrayaparā
sudhādhārādhārādhararucirudārā karuṇayā |
stuti prītā gītāmunibhirupanītā tava kalā
trayīsīmā sā māmavatu surasāmājikamatā || 4 ||
tulākōṭīkōṭī kiraṇaparipāṭi dinakaraṁ
nakhacchāyāmāyā śaśinalinadāyādavibhavaṁ |
padaṁ sēvē bhāvē tava vipadabhāvē vilasitaṁ
jaganmātaḥ prātaḥ kamalamukhi nātaḥ parataram || 5 ||
kanatphālāṁ bālāṁ lalitaśukalīlāmbujakarāṁ
lasaddhārādhārāṁ kacavijitadhārādhararuciṁ |
ramēndrāṇīvāṇī lasadasitavēṇīsumapadāṁ
mahatsīmāṁ śyāmāmaruṇagirivāmāṁ bhaja matē || 6 ||
gajāraṇẏē puṇyē śritajanaśaraṇyē bhagavatī
japāvarṇāparṇāṁ taralatarakarṇāntanayanā |
anādyantā śāntābudhajanasusantānalatikā
jaganmātā pūtā tuhinagirijātā vijayatē || 7 ||
gauryāssaptastutiṁ nityaṁ prabhātē niyataḥ paṭhēt |
tasyasarvāṇi siddhyanti vāñchitāni na samśayaḥ || 8 ||
